教育王國
標題: 有無上左小學家長知道 [打印本頁]
作者: pocoyo123 時間: 12-6-20 11:20 標題: 有無上左小學家長知道
小兒今年上小一, 在2010年11月在CAC做左一分評估, 當天做完時, 心理學家說小兒最後果半小時做得很差, 中間有好多問題佢同心理學家講, 我知不過唔想同你講, 因為我想走, 你留番下次先得唔得, 因此, 心理學家說佢知佢識, 因有D問題佢回答得好好, 但因最後的分數, 令成個評估出現好大偏差, 所以叫我地不要對評估的分數太著緊, 當時, 我心裡只想知佢究竟是去特殊定上主流, 其他我不太為己, 最後, 叫我們比佢重讀K3, 上主流小學...........問題來啦, 經過這兩年, 我及身邊很多人, 都覺得小兒很好, 同兩年前評估有相當大進步, 我也同佢班主任傾過(佢班主任是不知小兒有特殊需要, 亦不知小兒讀過S位, 因為這是間普通幼幼稚園沒有任何支援, 所以我們沒有提及), 班主任說小兒大致上專注力會差小小,又比較多咀, 需要有時去提醒佢, 但大致情緒,社交, 學術上OK,(學術上小兒已兩級鋼琴,PHONICS完成,劍橋英文STARTER,英文&數學平時比小一練習佢也可做到) 而且佢不會出位, 不會騷擾其他人, 因此, 我為他選了一間不錯的小學,這學校也是融合教育, (但不是名校, 不過比較嚴, 同校風好), , 但我收到教育局來電, 問我派到什麼學校, 我問佢問來做乜. /? 佢話會在6月底寄小兒的評估報告過去, 我一聽到就諗, 佢地學校8月底先見家長同學生見班主任, 你今個月底就寄果分兩年前的評估去學校, 佢地一見到, 就算唔可以拒絕收小兒, 也會先入為主對號入座? 當時我拒絕, 佢比左一分FAX我要簽回KICK起無需教育局比學校, 我做了, 但我想問大家幾個問題,.............. (1)如果, 學校班主任見過小兒, 又沒有說任何野, 而我又沒有比評估報告佢, 佢是否當小兒是平常學生咁教?................(2)又說, 我又希望學校比多小小關注小兒, 例如, 編佢坐前些, 留意佢多些, 是否我可在開學時同駐校心理學家提出已可? (3)我問過教育局可否重做評估, 佢話要上小學先同學校辛請, CAC不再跟進, 佢話曾經有一個小朋友在CAC評估時有輕度智障, 家長比左主流佢讀, 去到小三, 學校覺得佢好好, 就再做一次評估, 點知結果係智力正常, 我聽完好驚訝,點可以咁兒戲, 如果個家長當初比佢去左特殊小學, 咁咪吾人一生?(4) 如我在開學時立即交評估報告比學校, 小兒是否立即有支援, 無須再評估&等待? (5) 我其實是想先等學校見完小兒, 班主任又見過小兒之後, 睇下, 我在沒有任何示意前, 學校有無任何意見比我, 如果佢一見我兒已即可說出佢有什麼問題, 到時先同佢講, 如開學後也平平安安地, 我就不再說出來, 這樣好嗎?
THANK YOU
好長氣!!!!
作者: Capricorn2521 時間: 12-6-20 12:03
回復 pocoyo123 的帖子
我吾係小學家長，相信你都知。
我上星期去聽協康個SEN選小一講座，個教育心理學家同校長都講，如果你入小學前比學校知道佢有特殊需要，小一開學已經可以安排協助(我相信係小一果年學校可向教育局申請資源)。如果你等小一12月個識別計劃先報，可能要等小二先有安排。
佢地話咁樣會遲咗幫小朋友，浪費了一年時間。所以我覺得睇你想吾想/覺吾覺得有需要小朋友小一有多D協助。
作者: annaanna 時間: 12-6-20 12:15
都好明白你O既擔憂﹗
1. 你唔交報告，佢當然當你仔係普通學生教啦﹗
2. 如果只係普通想安排坐前D，到時可以同班主任講，不過一定問原因﹗
3. 我諗CAC唔會再評估，佢地做新CASE都做唔切啦﹗
4. 係咪開學即刻有支援，就要睇學校喇，因為唔同學生有唔同需要，多數都會開學一段時間先安排，有D 會上學期考完試先開始添﹗
5. 如果學校發現小朋友有問題先比報告，就可以要等小二先有支援，因為學校多數係學期頭申請有關款項﹗
其實支援除左係有人跟進之外，你仔需要考試調適嗎？個別學校會安排讀卷、比多D 時間做卷或功課上有調適等等﹗
不過如果你唔打算同學校講，呢D 問題你又未必問到學校喎~
作者: pocoyo123 時間: 12-6-20 17:05
annaanna:
請問是否不比報告就沒有調適呢? 定係上左小學叫心理學家再評估學校先決定比唔比你有調適?
我仲係諗緊調適呢個問題? 因為, 如一開始就有調適比佢, 我覺得係環境去千就佢, 我想佢去試左同一般同學一樣模式先, 努力過, 真係唔得, 先再同學校講, 希望小兒用自己努力去做, 不是每件事也要人千就佢先, 我知這樣我要付出很多時間及勇氣, 但未試過我係唔甘心一開始就SET好一個模式比兒子,希望成功
作者: 414928 時間: 12-6-20 17:41
你的想法我很明白,但你也要明白主流學校的運作,要得到調適必須要有仔仔的評估報告,學校才會作出相關行動,不是你想幾時要就有。
既然你都不把報告送到學校,就讓小朋友在小一嘗試下吧,如果有問題才要求學校做評估吧,但你不要寄望老師會對他有特別關注,因為別的學生如果有交出評估,老師當然會對他們優先關注,針沒有砍頭尖,有利必有弊。
作者: hktkomama 時間: 12-6-20 17:43 標題: pocoyo123 的帖子
現在的小學，你有特殊需要都唔一定有調適。我小朋友情況比你兒子還差，都沒有調適，只是因專注力差，考試時會抽離。
作者: penny_li 時間: 12-6-20 17:45
不要想太多，有支援好過無支援，校方係會重新問現在情況，如小朋友有能力，校方都不有特別對待，反而班主任會密切關心和溝通，係好事。
作者: kelvin_hmlau 時間: 12-6-20 18:00
pocoyo123,
聽過一d講座, 多數叫你剔左special 個欄, 雙方有個預算. 有個校長講者話其實每間津校都會收到幾個問題學生, 佢話唔介意. 但如果有家長不報告實情在先, 他會有d 憤怒.
問過d A仔上小學家長, 佢地話學校無乜特別資源, 只得兩個月一次言語治療, 一般已經唔會有社交小組. 考試時可能會讀同解題目.
如果你個仔唔係攪事份子, 我諗學校都唔會故意玩野, 讀唔上自然流失吧了.
作者: annaanna 時間: 12-6-20 18:01
回復 pocoyo123 的帖子
其實比報告學校，如果你小朋友問題不大，佢地都唔會有支援，不過會注意多D，咁唔好咩？
同埋間間學校都唔同，有D 有報告都唔理咁多啦﹗所以先了解學校吧﹗
作者: pocoyo123 時間: 12-6-20 20:17
我諗我會等到8月學校接見家長及學生時, 睇睇老師同學校怎樣說, 先再決定下一步怎麼做, 反正我有評估報告COPY, 到時有乜問題先交比學校
作者: 麻煩 時間: 12-6-20 22:50
本帖最後由 麻煩 於 17-6-1 07:48 編輯
......
作者: pocoyo123 時間: 12-6-20 23:13
點解我唔太想比學校, 因為去年搵K3重讀時, 已遇到問題, 大部分學校一聽有特殊需要已拒絕, 見都唔見, 最後, 我係要講大話隱瞞左, 先有K3收, 眼見又無問題, 相比起, 小兒班裡有些同學差過佢都有, 咪一樣無評估過.
雖然, 小學學校係唔可能拒收小兒, 但我聽過一個家長說, 他兒子讀一間官立小學, 報讀時KICK左SEN學生, 點知係惡夢開始, 班主任, 社工, 以至心理學家, 對佢都係歧視, 相同犯規, 只有佢兒子比人話, 經常用不同藉口叫佢轉校, 相信佢今年都會轉走啦, 雖然, 我唔清楚當中的誰是誰非, 但我覺得學校對一個SEN學生應有的基本包容也做不到, 故勿論這個小朋友是否真的跟不上, 但佢已表明佢的問題, 不是, 學校的包袱, 無用途就棄掉, .
暫時, 小兒一切都回正途, 所以, 我都係一句, 先觀察學校的包容度, 再作打算
作者: Capricorn2521 時間: 12-6-21 09:33
本帖最後由 Capricorn2521 於 12-6-21 09:33 編輯
回復 pocoyo123 的帖子
"學術上小兒已兩級鋼琴,PHONICS完成,劍橋英文STARTER,英文&數學
平時比小一練習佢也可做到...."
嘩，好勁呀! 學咗咁多野。想問吓K3這一年，你有冇同小朋友上OT/ST 或有關訓練呀 ? 如有，時間是如何分配的呢?
作者: pocoyo123 時間: 12-6-21 10:50
capricorn 2521:
在小兒S位時間, 我已觀察所得, 他學習能力不差, 一切問題在於專注力上, 因此, 我們改變學習模式,在S位第二年, 我開始上英文PHONICS單對單, 鋼琴, 游水, 以訓練佢的專注&協調能力, 打好了底, 去年K3開始停止ST,OT,PT, 因為佢已不需要, 因為鋼琴有初級底子, 去年到現在比我預期中好, 現在小兒可以在家每天練習1小時, 而我又堅持每天陪他溫習書, 英文, 數學一小時, 所以, 這一年我和兒子是付出很大努力, 當然, 開始時不是太順利, 亦不能太長時間, 由每天15分鐘加至1小時, 是需要慢慢來的, .
我相信每個SEN小朋友也有強項的, 家長要多賞試, 不怕失敗,不要心急, 要知每人也有不同能力, 希望幫到你
作者: rabbit1411 時間: 12-6-21 12:36
我的小朋友由小到大都在主流幼稚園到現在，只上過政府小組，無上其他，但在課外活動就參加好多，囝囝上得好開心，因為我無要求他學到幾多，只是練習專注同指令，在星期二見醫生都話他進步神速，所以我覺得耍了解小孩對正下藥是半攻倍
作者: jjcow 時間: 12-6-21 13:46
pocoyo123 發表於 12-6-20 23:13 
點解我唔太想比學校, 因為去年搵K3重讀時, 已遇到問題, 大部分學校一聽有特殊需要已拒絕, 見都唔見, 最後, ...
作者: rabbit1411 時間: 12-6-21 15:10
我地找學校艱難，過完一關又一關，一個難題又一個難題
有時都幾疲倦
作者: apple~y 時間: 12-6-21 15:41
回復 pocoyo123 的帖子
想問0下英文PHONICS單對單,鋼琴在那兒學??收費如何
要唔要小朋友語言能力達標先可以學呢??
作者: bobolam 時間: 12-6-21 15:43
回復 pocoyo123 的帖子
請問你仔仔評估是甚麼?
作者: 01shirley 時間: 12-6-21 16:52
想請教你仔仔係幾歲開始學琴、游水同phonics 呢？
我都想開始比我仔學琴！
但擔心太早小肌未ready!
作者: pocoyo123 時間: 12-6-21 18:51
jjcow:
官立學校近這兩年已口碑差, 老師太大流動, 以我所知只有廣東道官立小學依然接受&肯比心教SEN學生, 並其他我就唔多聽好啦, (當然有我不知)
今年搵小學真係好困難呀, 就算搵一些收生不足學校, 今年也多了很多人, 但入到去又担心太多SEN學生, 學校兼顧得來嗎?搵一些中等的, 佢地又好以好拒人於千里之外, 實在頭痛
作者: pocoyo123 時間: 12-6-21 19:24
bobolam:
小兒評估是, 自閉証, 專注力差, 活躍証, 言語遲緩
作者: jjcow 時間: 12-6-21 19:44
pocoyo123 發表於 12-6-21 18:51
jjcow:
官立學校近這兩年已口碑差, 老師太大流動, 以我所知只有廣東道官立小學依然接受&肯比心教SEN學生, ...
作者: pocoyo123 時間: 12-6-21 19:51
apple~y:
phonics個老師無教啦, 我暫時停左, 想佢教埋國際音標都唔肯啦.
相信英文要語言能力追得貼些先可, 但你可問下你個仔的ST, 叫佢比意見你
鋼琴在竇林學, 你可試讀協康會的電子琴型, 我最初也是試電子琴, 後來遇到這個老師, 先一路學下去,
作者: pocoyo123 時間: 12-6-21 19:58
本帖最後由 pocoyo123 於 12-6-21 19:59 編輯
01SHIRLEY, 我兒子正式學琴其實在去年初,約5歲多, 學左年半到, 已有兩級, 比我預期中好, 因佢是喜歡音樂, 而且好快上手, .
PHONICS是在5歲開始, 讀左一年多, 好可惜, 老師唔教.
游泳在6歲學, 也是小兒最慢上手, 佢學單車, 溜冰, 滾軸溜冰很快, 但游水到現在只維持在甩版階段
作者: Anpanmama 時間: 12-6-22 06:22
本帖最後由 Anpanmama 於 12-6-22 06:24 編輯
jjcow 發表於 12-6-21 13:46
乜唔係官校一定要收 SEN 咩？我仲一心諗住第日俾阿仔抽官校，唔會俾人叫走 ...
首先，無學校係一定收或者一定唔收SEN，包括官校。
響第一輪自行係靠分數，如果同分唔夠位就再抽(揀)，而去到大抽獎就睇彩數，無論有無響份表剔到特殊需要，響呢個階段都係機會均等。
當然，響自行階段，同分嘅點抽點揀；真係佢哋先知.
而報官校嘅好處係大家都無宗教分，只有舊生同兄弟姊妹有優先，是比較公平， 但唔代表官校一定要無條件收SEN ! 而去到叩門階段，學校更係可以全權揀收生，所以叩門嘅機會更可以話係好細。
整個俾我個感覺係: 你俾學校揀, 佢一定唔想收。但假如收咗就會盡力配合!
未入小一前，我都聽聞有啲比較出名嘅官校是會勸退一啲SEN，其實係津校又好，官校又好，名校又好，籮底橙收唔夠生面臨殺校嘅小學都好，都有被勸退嘅Case ! 但同一間學校，又會有SEN被叫轉校，亦有SEN係順利升班學習愉快！
我在小一選校表上有剔「特殊需要」，
開學前，自己做了心理準備，萬一小朋友讀得唔開心或覺得學校不太接受我哋，轉校也不都要覺得難受。始終無人想extra做多咗嘢!
開學後，大大小小的新挑戰和適應問題，都令仔仔和我好累好怕。又怕小朋友的差異被老師，學校嫌棄而要被勸退，但開學個幾月，學校已經有2週一次嘅ST，1週一次社交班，1週2次科目輔導班，全學年10次感統訓練。
之後在教育心理學家巡校時的見面(只有剔了特殊需要的學生家長可以在學期初獲接見, 及即時跟進)，所有有份教我仔嘅老師都列席，商量同了解家校配合!
老實，響呢大半年嘅小一生涯，老師們班主任甚至校工校長對我等SEN小朋友都關愛。
和老師閒談，原來老師，校長及治療師對我哋呢班早知有SEN而自報嘅家長好欣賞。覺得我們態度正確，比一啲隱瞞但被發現才上報嘅家長，係真正愛護小朋友，唔會浪費大家嘅時間而盡早俾小朋友上軌道！
小小嘅忠告，大家不要覺得主流老師會似幼稚園或特殊老師咁有一定有足夠能力及細心照顧每個特殊學生，始終1：25人，小朋友上小學前嘅自理必須處理好。盡量對學校及老師的教導信任, 自己配合他們, 不要妄想及要求學校改變而將就我哋, 保持參與但不干預嘅態度, 互相尊重!
開學時將小朋友嘅特性，脾氣，能力等告訴社工、班主任等；減少老師摸索小朋友嘅時間同疑問，令雙方都盡快適應。
贊成樓上所講，如果小朋友有能力報直資及私校，橫掂都唔會有支援；都真係無必要馬上同學校上報。到老師真係有疑問先報告都未遲！
加油!
作者: polly0503 時間: 12-6-22 06:51 標題: Anpanmama 的帖子
anpanmama :你的小朋友間學校真係好好，大女今年都入小學，係情绪方面佢較大問題，專注方面又差，我真係好擔心黎緊呢6年的生活。
我唯一可以做就係幫他揾D專注力班上自己再揾資料學習怎樣可以管教個女。
呢條路好難走好想揾同路人互相支持。
作者: Anpanmama 時間: 12-6-22 07:03
polly0503 發表於 12-6-22 06:51
anpanmama :你的小朋友間學校真係好好，大女今年都入小學，係情绪方面佢較大問題，專注方面又差，我真係好 ...
同學嘅媽咪介紹我去灣仔小童羣益會上專注班, 話好好!
我未join, 你可以留意吓!
香港成長發展中心 - 活動資料
作者: pocoyo123 時間: 12-6-22 11:33
anpanmama:
我在小一選校時, 自行階段有KICK特殊需要, 所以, 在6月中教育局打比我問選了那一間小學, 佢地SEND份報告比學校, 但, 到左今日我又覺得分報告同小兒今日的能力相差什遠, 所以, 先想HOLD住, 先比學校觀察小兒的情況, 再作決定.
其實, 想問你, 因為我自行時也是選此校, 當時已KICK了特殊需要, 是否無論教育局有否SEND報告去學校, 學校也有紀錄小兒是SEN學生?我並不是想隱瞞學校知, 只是一心想先比學校同老師實在現場觀察小兒, 因為佢地係陌生的, 無外來主觀因素左右觀感, 待聽取他們意見後再說.
你小朋友的學校真是很好, 相信讀得很開心.
我兒子的小學其實不太多支援, 雖然說是一間融合學校, 但只有言語治療(但我兒無需要), 學障小組, (暫時我兒觀察上不是學障), 一些課後輔導班, 調適,補底等等, 所以, 就算我報上去, 學校都沒有什麼比到我
作者: HMA 時間: 12-6-22 11:37
我在小一選校表上應有剔
”特殊需要”, 但現在仲未做小一前評估. 之前有人問是否同意把評估report交小學.因還沒有report, 所以拒絕了.現不知是否做錯了?可怎辦?請幫忙,謝謝!
作者: McDonna 時間: 12-6-22 15:26 標題: 引用：我地找學校艱難，過完一關又一關，一個難題
本帖最後由 McDonna 於 12-6-22 16:56 編輯
原帖由 rabbit1411 於 12-06-21 發表
我地找學校艱難，過完一關又一關，一個難題又一個難題有時都幾疲倦 ...
就算係主流小朋友、上小一都非一帆風順，努力克服適應，我之前做好心理準備、學期初都非常擔心沮喪。
都係後尾老師叫我放鬆啲咋!
作者: McDonna 時間: 12-6-22 15:38 標題: 引用：我在小一選校表上應有剔”特殊需要”,+但現
原帖由 HMA 於 12-06-22 發表
我在小一選校表上應有剔
”特殊需要”, 但現在仲未做小一前評估. 之前有人問是否同意把評估report交小學.因 ...
到開咗學約2個月，見完訪校嘅教育心理學家，同老師們傾完，我先簽同意書將個報告send俾學校參考。
作者: Anpanmama 時間: 12-6-22 17:36
pocoyo123 發表於 12-6-22 11:33
anpanmama:
我在小一選校時, 自行階段有KICK特殊需要, 所以, 在6月中教育局打比我問選了那一間小學, 佢地S ...
用唔著學校嘅支援應該高興, 因為小朋友原來係得架!
作者: HMA 時間: 12-6-22 17:56
謝謝大家的回覆.但如不給report比學校,是否便要遲一年先有支援, I mean 放學后的training. 還是剔了特殊需要的學生,在p.1時巳有支援?
另可否告知如何可知學校有那一些training classes available for children with special need, 是否要開學后先問班主任?
對不起, 我的問題很多亦可能很傻.但我身邊的人沒有我的問題, 我不想錯過了學校可給與的支援.
作者: pocoyo123 時間: 12-6-22 19:21
hma:
你今年上小一, 為何還沒有評估?你可打去CAC追問社工怎麼辨?
我估如學校開學時收唔到報告, 就好以我CASE咁, 等佢來發現你需唔需要支援, 好以最快要年底先評估, P2先有支援
作者: Anpanmama 時間: 12-6-22 21:06
本帖最後由 Anpanmama 於 12-6-22 21:12 編輯
其實剔咗小一選校表格上「特殊需要類別」, 學校開學就會跟進, 約1-2個月後支援班就開始。
我都係俾哂ST, 補底班同社交班先至transfer 嗰 report 俾學校!
作者: hungmabbbb 時間: 12-6-22 22:03
回復 pocoyo123 的帖子
anpanmama 請問你個小朋友是讀哪一間學校,可否PM給我, thanks!
作者: polly0503 時間: 12-6-22 22:27
回復 Anpanmama 的帖子
Anpanmama : 太遠啦!我仲有個2歲細女要湊
.
作者: HMA 時間: 12-6-22 23:56
很感謝pocoyo123 and Anpanmama的解答。其實我也曾排到做大評，但卻因發燒而要要求改期。他斷斷續續的病了幾個月，我不敢打電話給社工
。希望開學前可排到啦
作者: psv 時間: 12-6-23 00:42
回復 Anpanmama 的帖子
Anpanmama,
可否pm吿知你小朋友讀緊邊間小學？因嚟緊我要開始煩惱幫小兒搵小學！另想請教如果第日做嗰個小一入學前評估，假如心理學家建議要入特殊(只暫作最壞結果),家長係咪可以堅持入讀主流呢？(因我覺得嗰d政府評估真係好兒戲)同埋第一輪或第二輪抽獎有無年齡限制？(如適齡加分或超齡無分)另外，主流入面會否讓家長做影子老師呢？唔該哂！
作者: myapple 時間: 12-6-29 13:27
本帖最後由 myapple 於 12-6-29 18:28 編輯
------- deleted -----------------
作者: HMA 時間: 12-6-29 14:34
Anpanmama,
可否pm吿知你小朋友讀緊邊間小學? 須巳選了小學, 但還未知道會否適應到,萬一.....:
,希望多一個選擇的機會.謝謝!
作者: Melissa_Tam 時間: 12-6-30 22:12
你選那間是否政府學校？其實是共融，應該要照顧有特殊需要的小孩才是，如果知你兒子有問題而諸多留欄，這間學校不讀也罷，我係你就坦白寫出來，如經濟能力許可，可去做私人評估，證明你個仔是有能力
作者: olima 時間: 12-7-5 09:48
回復 Melissa_Tam 的帖子
對，如可以，做私人評估，將政府兩年前的報告及最新的私人報告一併交學校，老師會看到孩子的進步，及欣賞家長放在孩子的心機。
pocoyo，還有一點要注意，就是你提及八月的面談是全體同學及老師嗎﹖如是，那只是一些較general的briefing，不會針對有問題的孩子(因假設見的都是一般學生)。你亦會不好意思在這場合提出你關注的問題。
如果有剔有特殊需要的學生，學校一般在開學前會有社工見家長，針對小朋友需要及安排。
pls check pm.
作者: fandd 時間: 12-7-6 15:51
回復 pocoyo123 的帖子
「(1)如果, 學校班主任見過小兒, 又沒有說任何野, 而我又沒有比評估報告佢, 佢是否當小兒是平常學生咁教? 」
如果小朋友「真是」表現與其他小朋友無異，當然當平常學生咁教。
「(2)又說, 我又希望學校比多小小關注小兒, 例如, 編佢坐前些, 留意佢多些, 是否我可在開學時同駐校心理學家提出已可? 」
如果你相信學校，希望學校可多關注囝囝，你便應直接向班主任詳細交代；囝囝長期對住的是「老師」，而不是「駐校心理學家」，加上駐校心理學家知道，即最後也會讓班主任知道，為何要那麼轉折？緊記：作為小一學生，最能協助他的首推班主任。
「佢話曾經有一個小朋友在CAC評估時有輕度智障, 家長比左主流佢讀, 去到小三, 學校覺得佢好好, 就再做一次評估, 點知結果係智力正常, 我聽完好驚訝,點可以咁兒戲, 」
政府的評估就是這樣馬虎。如經濟許可，家長一定要找私家作評估。
「(4) 如我在開學時立即交評估報告比學校, 小兒是否立即有支援, 無須再評估&等待? 」
要視乎報告內容而定！多數教育局的教育心理學家要再作觀察或評估。即使不用再作評估，由於小學是政府資助，有關支援也不是「即時」供應，把文件往來的時間也計算在內，最快也要數個月後。
「(5) 我其實是想先等學校見完小兒, 班主任又見過小兒之後, 睇下, 我在沒有任何示意前, 學校有無任何意見比我, 如果佢一見我兒已即可說出佢有什麼問題, 到時先同佢講, 如開學後也平平安安地, 我就不再說出來, 」
這樣就要看看你囝囝的平日表現。如估計他在課室內的表現與其他學生表現分別不大，你才可考慮使用這方法。(你應「客觀地」回顧囝囝的表現，及當時老師的評價。)
「他兒子讀一間官立小學 , 報讀時KICK左SEN學生, 點知係惡夢開始, 班主任, 社工, 以至心理學家, 對佢都係歧視, 相同犯規, 只有佢兒子比人話, 經常用不同藉口叫佢轉校, 相信佢今年都會轉走啦」
以上極其量是少數的例子。相信大部份老師遇有問題學生，也希望可盡力給予支援；但同時，他們也要保障班內其他同學的學習機會。每當遇到問題學生干擾其他同學的學習，老師定會嘗試各種方法，以保障各類學生的權益。
總結
小學的資源與幼稚園的不同，學校可以做的其實不多：試卷或功課上調適、非密集式的言語治療或社交小組。這些措施對病情輕微的學生仍可，但如果小朋友的問題較大(例如不聽指示、不肯坐定定、知障等)，所收的效果肯定不大。
作者: pocoyo123 時間: 12-7-6 18:59
FANDD:
你的解釋很長細, 多謝.
曾考慮再做一份私家評估, 但價錢實在太貴, 唔想浪費金錢
我們決定開學後, 睇定些亞仔的表現再諗, 亦有作最壞打算, 見步行步, 希望一切順利
作者: fandd 時間: 12-7-7 08:41
To
ocoyo123
轉寄自「saiman1408 的帖子」
「首先你不要怕學校察覺，反而你要主動向學校講清楚你仔仔問題，因為這樣老師 才可包容及多留意你小朋友，如果你都怕學校又點幫你呢!而且好多時都要學校配合，小朋友才可在學校過得開心，你要放鬆去面對，多跟老師 溝通，多向有關人士查詢，加油！」
作者: baby_cat 時間: 12-7-7 19:14
睇完你既POST, 我都好明白你既感受, 只想個小朋友正正常常地返學. 有時, 我都見到D好百厭既小朋友, 我都覺得佢地有問題多D.
講真, 我都唔知你做得對不對. 只想真心祝福你個小朋友一切順利.
作者: Zhawnice 時間: 12-7-8 15:13
見到這裏的媽媽為子女的無私付出實在很感動，很多擔憂很多壓力只有自己最懂，也沒法子，我們愛孩子，當然想為他們安排最好。
大家加油！
作者: joyss 時間: 12-9-28 00:08
Pocoyo123
I am facing the same question as yours. So, I would like to seekin for your comments. Have you make the decision whether you will disclose to school. My son is P1 and I did not disclose my son is SEN student to school. However, the begining of P1 is not as smooth as I thought. So, I am really struggle.
| 歡迎光臨 教育王國 (/) |
Powered by Discuz! X1.5 |