教育王國
標題: 請各位指點下我,好無助! [打印本頁]
作者: scso 時間: 13-1-18 19:37 標題: 請各位指點下我,好無助!
我兒子今年剛升中一,小學的成績各科平均都有80+,但上到中學由9月至今一直有問一連串問題發生,唔叫佢就唔溫書,下下要叫先拿住本書,各科老師都時常打電話給我什至己見了兩次家長,問題係欠做功課/欠改正/默書及測驗唔合格/上課時大聲講野大聲笑搗蛋影響同學上堂引至有些家長投訴,仲話我唔教仔,攪到咁黑人僧,我對家長們都非常唔好意思,但我控制不到,佢又試過跟同學有口角及並傷事件,己見了社工成兩個月,仍無改善,自理能力差,時常把東西漏帶及唔見了,淨係八達通都唔見咗兩三次,銀包,外套,文具等......因爸爸經常在外地工作所以家中所有事情都是我扛,小朋友的問題老公只會話我唔管好,都12歲唔通下下打佢?但我的心裡及精神己經很累,無日安寧,老師時常找我投訴,我又無能為力,老師們是否在罰緊我要我見家長?個仔攪成咁我都好唔想好無辨法,同個仔傾過/鬧過/狠狠地打過/搵佢最專重的專長同佢傾過/罰佢無零用錢或佢最喜歡的食物都試過都無改善,我可以點做?應否帶佢睇精神科?因佢現在那間中學是私立的,因佢都唔認真讀書浪費金錢,應否轉讀津貼學校呢?而補習每星期三日,應否cut呢?應否去外面讀寄宿學校呢?得12歲唔讀書又唔可以,佢將來條路會好難行,我就快瘋了.
作者: longlokma 時間: 13-1-18 20:57 標題: 回覆：scso 的帖子
明白你的處境......第一，你仔有小學同學或其他你認識的朋友一起升讀这间中學嗎？如有，可向他们了解一下你仔在校的情況; 笫二，这中學是否程度不適合你仔讀，或是由中小升英中，他上堂不明白而產生挫折感呢？第三，你仔有否交上損友？可小心观察他; 第四，多關心他，暫時不要著眼學業，先多溝通希望可了解他的心事，從而解開他的心结
作者: 杰杰媽媽 時間: 13-1-18 20:58
本帖最後由 杰杰媽媽 於 13-1-18 20:59 編輯
請問你係咪由細到大自己湊,冇返工?
佢小學都成日漏野,咩都要人提幾廿次?預備埋俾佢?
作者: wyl 時間: 13-1-18 21:51
試吓再同佢平心靜氣傾吓計，開學至今，學校生活如何？和同學相處如何？有否受到排擠？係咪唔能夠適應中學生活呢？係咪唔中意間學校／老師／同學而引致這些偏差的行為？成績遲吓再講，先要糾正你倆的關係同佢學習態度。慢慢嚟，比多啲耐性佢。你諗吓，如果你放棄佢，佢就更加放棄自己，所以你一定要支持佢！
作者: 安格斯媽媽 時間: 13-1-18 22:11 標題: 回覆：scso 的帖子
好同情你遭遇，我仔仔都是剛上中一某些情況跟你好相似，但我很好彩他上月開始改變，他自理能力也很差欠功課、欠通告、書包好似垃圾崗，多野到就黎爆，時常找不到所需多西，測驗提左個幾星期都不肯帶書回家，唯一唔同的是他過份正直，不喜歡同學粗魯，怕老師罰，但無野可以吸引他，不需獎勵，好彩他信任社工，愛戴師長跟我關係良好，咁多年惡習在短短兩個月突然改變，將所有書從locker用環保袋帶回家，清理書架，將書分類，雖然也有欠功課，但已經進步不少，試找出原因加以輔導，找到正確方法可能幫到他
作者: scso 時間: 13-1-18 23:46
回復 安格斯媽媽 的帖子
你仔仔跟我仔仔真係幾似,我係全職媽咪+工人,因當時他兩兄弟年紀少唔放心工人湊所以先唔返工,點知湊咗兩個"港童"出來,自理能力差,其實佢唔係壞個種,佢仲係好單純,我從來唔比佢跟同學自己出街玩,佢間學校是Band 1 尾,而小學成績都唔差,小學都係英小,而且他一向有跟外籍老師補習了5年每星期一堂,相信英文不是問題, interview幾間直資中學都全部收佢,到最後先選了這間,因近屋企撘地鐵只係3個站,這間學校校風唔錯,但因為佢地有自己小學升上的,外面考入去的只佔約30+人,我仔是由外面學校考入去的,所以我唔認識任何家長及同學,所以了解唔到我仔在校內情況,我仔從來沒有跟我提佢在校的情況,我親戚今晚都同我傾話覺得我仔太聰明,小學D野淺所以佢比較lazy,而上到呢間中學較深可能追得吃力,以前又lazy慣了,可能因為咁所以上課無心機搗蛋,所以追唔上而中學又比小學較free老師無咁多管束,要靠學生自己自律,可能就攪成依家咁,以上是我親戚的感覺,有時我知自己好激心火起上嚟對呀仔講咗D好hurt佢既說話,但當時因自己也太失控無心講了出口,希望呀仔忙記咗啦,其實我應否不再漇錢在佢身上轉間津貼學校或是找間寄宿學校等佢學下自理,最好有得比佢當下兵,我應怎辨呢?
作者: cy.muimui 時間: 13-1-19 00:17
其實你不如揾日同阿仔傾吓,瞭解佢有咩困擾,但係注意自已説話既措辭,千祈唔好比佢覺得你唔滿意佢,慢慢傾,你仔仔如果升中先係咁,會唔會係未適應呢！
作者: 安格斯媽媽 時間: 13-1-19 06:10 標題: 回覆：scso 的帖子
慢慢來，不要亂，找出原因，其實很多男生都是這樣，但找到正確方法很快改善，我已經有好開始，努力！終有一天會有人幫到他的
作者: 安格斯媽媽 時間: 13-1-19 06:29 標題: 回覆：scso 的帖子
試下找方法問他學校情況，有跟社工班主任了解過嗎?我每天會帶仔上學後上班，他會跟我談論老師，同學及學校生活點滴，現在他非常喜歡學校生活，其實他改變可能學校幫助很大，現在他會說喜歡上課不用做功課，但不喜歡放假要做功課，佢覺得在學校老師好funny，學到好多野，跟小學完全不同，小學老師很少將自己生活用來上課，中學老師年青有大哥哥感覺，他連最惡既老師都用另一個角度欣賞她，所以自然愛上讀書，自己安排時間溫習，但當然要在旁提點，否則只會對着電腦
作者: 杰杰媽媽 時間: 13-1-19 07:49
了解下會唔會因為多數同學都唔熟,而其他同學都係由小學直升,做成佢可能係學校冇咩朋友,所以佢可能放PEAR自己黎引人注意
試下同佢傾下, 佢唔做好自己就唔會有朋友.
作者: hw1115 時間: 13-1-19 08:40 標題: 回覆：scso 的帖子
寄宿學校就唔好啦!
可能佢會覺得你放棄佢架!
佢自理能力都唔得,你真的放心嗎?
不知留在身邊自己quide 住佢做啦!
加油!
作者: longlokma 時間: 13-1-19 08:49 標題: 回覆：杰杰媽媽 的帖子
這階段還早，不要有放棄孩子的想法，你這樣轉他去寄宿學校，恐怖他會以為你討厭他流放他了！ 那麼好難再有機會改善關係。再者，不要想／說他是在浪費你的金錢，他知道會很難受，以為家人也看不起不支持他了！
真的要了解清楚兒子發生了什麼事，面對着什麼困難，平心靜氣去跟他傾下 ，不要罵不要批評，只是用心聽.
其實我有親人的孩子也是好聰明，但升中后在校生活不開心，結果不但學業一落千丈，中2開始還變得收藏自己甚至不肯起床返學！最後親人和那孩子好好溝通後同意替孩子轉校，在新環境従新開始，那孩子之後一切回復正常，竟然會自動自覺努力讀書，而且和家人生活愉快，現在已上大專了！
樓主，有時問題不一定只源於一方面，或者現時學校內有令你兒子不適應不舒服的地方，好好和他傾下，陪他支持他走下一步吧！
作者: Meikin 時間: 13-1-19 09:24
本帖最後由 Meikin 於 13-1-19 09:25 編輯
找機會跟孩子傾吓, 認真聽聽他的心底話, 先了解佢的想法, 才可以對症下藥, 否則做任何事都治標不治本.
阿仔中一時同班也有部份外來的同學是這樣, 可能未能適應學業/朋友/其他, 於是對人蝦蝦霸霸, 撩人打交, 以壯自信, 又或超搗蛋, 引人注意. 但升上中二後, 這類同學都正常返好多, 可能慢慢適應中學, 並找到自己的定位.
至於自理能力差, 十個男仔起碼有七八個都係如此. 我仔今年中二, 依然改善不大, 本週已唔見咗三樣東西, 甚至温默書都可以温錯範圍, 但佢就擺出一副大不了的模樣, 我昨晚先大罵佢一場......希望下年佢又好少少啦!
作者: 安格斯媽媽 時間: 13-1-19 10:59 標題: 回覆：scso 的帖子
今天派成績表，他平時分影響下，結果徹底失敗，學習態度，本質評語是好的，期待下學期進步，因為他已開始改進
作者: scso 時間: 13-1-19 11:59
其實有時激氣,真係有D憎佢架,太累了真係有少少想放棄,老師時常搵我而我又解決唔到佢既問題真係覺得老師好煩,因教唔到所以先唸去寄宿,想送佢去新加坡或大陸近近地,佢有假期可多D返嚟,又或者我可時常過去,等佢無咗我同工人駛靠自己,佢太依賴我所以覺得佢變蠢了,唔識隨機應變,我見佢有同學無工人湊屋企人又要返工只有跟大兩年的哥哥自己食飯做功課,那位同學自理能力又好,成績又好,可能是個鍛鍊?所以先唸寄宿,等佢乜都要靠自己
作者: khmama 時間: 13-1-19 12:16 標題: 回覆：scso 的帖子
你仔仔小學時有冇類似嘅行為？呢間學校佢究竟鍾唔鍾意？
作者: Yanamami 時間: 13-1-19 12:33
scso 發表於 13-1-19 11:59 
其實有時激氣,真係有D憎佢架,太累了真係有少少想放棄,老師時常搵我而我又解決唔到佢既問題真係覺得老師好煩 ...
So... would you consider not having a domestic helper? You're right. Without a domestic helper at home, kids will become more helpful and independent.
作者: 龍舌蘭 時間: 13-1-20 17:47
如我未記錯, 阿囝的情況似乎同入小一有點相似了. 這幾年來有改善嗎? 如果小學有轉變, 是不是中學的環境變化大令他又出現狀況? 俾多D時間去適應好嗎?
作者: wgcw1210 時間: 13-1-20 22:50
樓主唔好咁興住,
原因可以好多, 例如會唔會係唔識人都係一個問題?
其實, 我之前教開書, 都係跟開初中, 好多初中細路仔會不自覺同屋企關係差左, 中間可以好多原因, 再加上你家人之間0既關係又唔係一朝一夕建立, 好多嘢我地外人唔明, 好難話一朝一夕轉化同你地0既關係
我覺得首先唔好令你地母子關係差落去, 首要唔好太多爭執先, 搵D可以讚佢0既嘢著手, 跟據你所講, 佢程度應該唔係弱, 先同佢執功課先, 如果積左好多功課, 仲點溫? 有D初中男仔好反感比人check住晒, 如果你仔仔唔介意比人check, 可以先執功課, 請佢每日寫清楚有咩功課要做, 中一功課應該唔多, 比佢睇到原來佢可以handle到, 成就感大D, 其他事好辦
作者: kenken1 時間: 13-1-21 09:52
提示: 作者被禁止或刪除 內容自動屏蔽
作者: liontiger 時間: 13-1-21 11:08
回復 scso 的帖子
最緊要時時同佢傾吓，了解下佢的心底。我發覺好多升到中一都係360度轉變的，我個仔也是一檥。也有類似你發生的問題。不過可能没有你那麼嚴重。我非常明白及同情你的現在的心情。唔好放棄，做呀媽係好難受，不過也要繼續和他溝通，好似我一檥。我經過這個月來的努力，我個仔岩岩考完試，但由聖誕假期開始我們督住佢温書(佢的爸爸和他一起温習)，直到現在佢考完試了，佢嘅態度已慢慢開始有好的改變了，不論佢考出來的成績怎樣，我們也覺得佢有了少少的進步了。請你不要放棄，佢也會被你感動的。
作者: csy_ma 時間: 13-1-23 03:11
scso 發表於 13-1-18 19:37
我兒子今年剛升中一,小學的成績各科平均都有80+,但上到中學由9月至今一直有問一連串問題發生,唔叫佢就唔溫 ...
睇咗您個post，發現您所講既資料顯示：
1. 您同囝囝在新學校都面臨很大壓力：大聲講大聲笑和搗蛋，係青少年常見情況，竟可引致家長投訴，那投訴的家長親子關係大概很不錯，家長也非常有控制力度。
2. 欠做功課和欠改正：要看頻率，一般來說，超過十次學校才會有所行動（我囡都好似近十次了），那您囝囝大概已超過幾次？
3. 默書測驗唔合格：有什麼大不了？我囡默書幾乎次次唔合格。剛升中，臨適應，考試不合格也大有人在，放鬆D啦。
4. 時常漏帶東西和遺失：漏帶東西，也是初中生常見惰況。遺失就肉痛點，但遺失是一種習慣，好像不會僅僅現時才會有？
5. 跟同學有口角，繼而動手，事情就嚴重些。
您想想，老師經常找您投訴，您都面臨很大壓力，那您囝囝所面臨的壓力可想而知。而您文字透出來的厭倦感和疲憊，您囝囝亦沒理由感受不了。他很可能是面對初中適應，卻又覺得被各方針對，孤立無援，於是便放pei
。
才中一，路還有很長，首先是您自己放鬆，這所學校如不合您囝囝，便跟他商量轉校，天不會塌的。不過，最好首先改善家裡氣氛，先找爸爸談，青春期男孩子既發展，爸爸不可缺席。之後，放輕鬆後同老公一齊跟囝囝商量，問佢打算如何？要不要轉校？首先讓他了解自己的情緒，說出來，就像您在拉得太緊時，也上來EK發洩一下，縱然我們都是隔靴搔癢，有人予以問候，和分享類似情況，表明您並不孤單，也是好的。
別太在乎囝囝的成績，先執態度。但新學校似乎是四面楚歌，環伺的氣氛似乎不太對？考慮換一間學校，但轉校和選校要跟囝囝一起作決定，否則他只會逃避。
作者: csy_ma 時間: 13-1-23 03:20
記住旁人講的，遠不如您兒子實際感受重要。要試試走進他的角度來看問題。
最緊要跟他一起找一間適合他的中學，在尋找、叩門既過程中，佢自己可能會慢慢理解到自己的位置。凡事，別都幫他扛，中學生了，對自己的生活也要參與決定，您應將個波交返俾佢。總之，別要為學業而抹殺了囝囝的快樂。您跟他，都應配有更開朗愉快的家庭生活。
作者: yovin 時間: 13-1-23 04:10
1]同仔仔一起找長假期 , 用十天苦修行(在港的) ,不語十天 , 冥想 , 打坐 , 少吃.......很多人十天後便会有得ｏ
2]又或找高天指點迷津 , 一命 二運 三風水 , eg有時一張地毯的擺放可以解决問題或化解怨氣，不是要你迷信 , 但這是中國傳统文化中的科学。
作者: mesmerising 時間: 13-1-23 09:39
本帖最後由 mesmerising 於 13-1-23 09:45 編輯
有一個問題你問了不只一次，就是應否因怕浪費金錢而轉津校，或另一方向：寄宿。個人覺得因著你經濟不太緊的前題下，不要因省錢為由而轉校。更不應在＂未jup掂＂兒子的問題前把他送往寄宿。因兩者都會容易被孩子看作放棄他。
那麼，可否轉校？當然可以。但原因只應有一個：就是你認為現在的不適合。不論轉津或私校，你只是希望找一合適的來幫助他。而找校過程可找他一起參與，一起選。那會令他更投入。
作者: 黃巴士 時間: 13-1-23 11:40
scso 發表於 13-1-18 19:37
佢又試過跟同學有口角及並傷事件
撇開成績/功課/欠文交/上課搗蛋.....
佢在校俾同學們排斥嗎?? 
作者: scso 時間: 13-4-22 23:58
今期見家長攞成績表老師話佢好大機會會留級,好慘,佢仲唔明浪費時間,將來一定會后悔,操行又差,我想幫他己無力氣了
作者: Teresa 時間: 13-4-23 00:53
scso 發表於 13-4-22 23:58
今期見家長攞成績表老師話佢好大機會會留級,好慘,佢仲唔明浪費時間,將來一定會后悔,操行又差,我想幫他己無 ...
而家佢升上左原校中學 (人人話既"名校"), 外來學生個個都係band 1, 最差嗰group都係自己小學上. 上左中一, 情況更差, 扣conduct扣到攞E grade, 留堂留左好多次. 佢唔係蝦蝦霸霸, 不過同小學一樣. 上學期見家長, 人地見10分鐘, 我地見20分鐘, 仲要見社工, 訓導, 前後見佢地見足三個鐘. 我真係同佢地講到喊咁滯.
我一直懷疑佢係咪ADHD, 由小學到中學, 問左幾個老師佢似唔似係ADHD, 佢地個個都話我仔唔係, 唔使同佢做assessment. 直至中一時有家長同我講, 學校其實有Edu psy, 可以refer呀仔去. 求社工求左大半年, 呀仔有次問"其實我係咪有病?" 社工終於肯refer佢見Edu psy.
見左Edu psy, 開始有轉機, 覺得佢可能係專注力問題, 加上升中, 各科都深左, 追唔上, 就更加唔願讀, 惡性循環.
最後, 佢要repeat.
我暑假同佢做assessment, confirm佢有少少專注力問題. 知道左, 我帶佢見精神科(C家).
醫生初次見佢, 佢好有敵意, 不過都肯同醫生傾. 醫生話佢其實最大問題係反判性對抗Oppositional
defient disorder. 冇藥食, 只靠我地改變parenting skill同"放手".
今年repeat, 上學期只係少少進步, 不過下學期呢牌就明顯有進步. 我覺得係因為我真係放哂手 (因我冇左工人, 忙到冇時間睇佢功課), 加上佢班主任冇放棄佢, 當佢係班中大呀哥lead同學, 同埋呀仔自己覺得知衰, 唔想再比人睇死.
佢呢牌test, 成績唔錯, 全係自己讀. 係我同班主任夾埋, 鼓勵佢要試一個岩自己既讀書方法. 佢試左大半年, 佢話試到了. 而且佢話好享受成功既good feeling (呢樣係佢講, 我真係好開心).
佢而家已經自動波做野, 甩漏一樣冇咩改善, 不過好過以前少少, 間房都係一樣亂, 我都冇理喇.
所以話, repeat唔係壞事. 我覺得, 男仔真係要自己trial and error佢先會肯改變.
加油! 希望你仔仔好快好似我仔一樣有進步.
作者: Leungwailam 時間: 13-4-23 23:30 標題: 回覆：Teresa 的帖子
深同感受，我仔是中一生，也是個ADHD的小朋友，我諗湊佢要花多吾知幾倍的精力，升中後，成個人變哂，不停挑戰我底線，我對佢好攰，心想係咪佢吾適應間學校，因為學校都厳，佢已記2個缺點，見佢好辛苦，都想同佢轉校，我又怕仲hea，老師話佢有改善，但係我吾覺，如果吾係吾駛記缺點，點講呢?唉吾識講
作者: scso 時間: 13-4-23 23:50
我覺得個仔好似無自尊心咁,比人投訴,比人鬧到死死下,比人睇死,比人罰小息罰留堂都無感覺?無得救,嘔血
作者: lihoho 時間: 13-4-24 13:13
回復 scso 的帖子
他會不會係失去了自信， 所以都不care自尊? 有無野(學業以外)係他叻的， 例如音樂或體育，俾他放多D時間係呢D方面增加自信? 有個朋友個仔今年中三，都係成日要見家長，攪到家長都不知點面對學校。 點知他個仔有次跑步跑第一，有牌拿之餘，仲有張獎狀，他的自信即刻返哂來。雖然其他科未至於考得好好，但做野上心了，亦緊張了自己的成績。你都試下發掘你仔的長處。
| 歡迎光臨 教育王國 (/) |
Powered by Discuz! X1.5 |