同學騷擾

A-Mum

回復 justin2003 的帖子

我個仔上年調過四次位，成日同啲學術差或曳曳同學仔坐，佢有同我地呻過，我地解釋佢聽呢類小朋友需要同學仔幫忙，老師編你坐佢哋隔離，係睇得起你，幫下人啦。佢聽完開心啲，我地又無再理。

到調完第三次位，佢放學話我聽，今次個隔離同學仔極曳，佢自己去咗揾班主任要求調位，不過班主任同我地講嘅一樣，話佢專心呀、定力夠呀、成績好呀，叫佢繼續幫同學。我以為佢會唔開心，點知佢反而覺得係種光榮，仲諗辦法去‘教好’同學仔。

我本來估老師第四次調位會獎下佢，俾番啲好日子佢過，點知都係一樣。我當時其實有啲失望，不過又唔可以話阿仔無得著，佢有老師認同，人自信咗；佢上堂俾人嘈住聽唔到嗰啲，佢又會自己落堂捉住老師問明為止，都算識自己解決問題；所以又算。到今年開學編位，同一位班主任俾佢跟老友坐，因為信得過佢地識自制，唔會上堂傾偈。遲來的獎賞，阿仔開心兼招積咗一排！

我估每個問題都可以有多個辦法解決，如果阿仔當日情緒好困擾，或成績有問題，我會介入；如果唔係，可以考慮睇下先, 或者叫佢自己再搵下老師傾下。都係種學習嚟嘅。