學琴之後...

pianology

我都好同意家長唔好一開頭就買鋼琴比小朋友，一來係貴，二來咁容易比小朋友得到，佢地唔會好好珍惜。

其實練習除左係練熟之外，最重要係建立「責任感」同埋「堅持」。因為初級其實比較簡單，小朋友可能練2、3次就練熟(係同一日喎)，咁係咪練熟左就ok呢?而且，我有好多生到左考試或者功課多既時候，就話：「miss, 我今個星期冇時間練呀!」咁我就會話：「你每日都有功課做，每日都要交功課，咁你係咪成日都欠交架?」佢地話唔係，每日都交齊功課。咁我就會同佢講：「咁miss一星期比一次功課你，但係你成日都欠交喎!你每日可能花2-3小時做學校功課，咁你都應該可以花20-30min練下琴。如果可以做快半小時功課，咁咪有時間練琴law~」講完之後，佢地就會明白到學習音樂其實同學校學科一樣重要。

雖然我唔建議小朋友長時期用電子琴練習，但各位可以既話，都花幾百蚊，買一部比較多鍵既電子琴比小朋友係屋企練，然後再一星期帶小朋友2-3次到琴室練。

係練習方面，我有好多學生對「練熟」有唔同解釋，有d覺得彈到就得，但可能跟本就唔熟；有d就會由頭到尾都彈得好熟；有d就問我：「miss, 點解我彈得冇你咁好聽既!」
而我通常都會先要求小朋友練熟，然後先再要求佢地將首歌仔彈得好聽，又或者要佢地一路唱，一路彈。咁係佢地彈唱既同時，可以用相機錄低佢，小朋友會覺得好開心，好似表演緊咁。千其唔好要求咁低，但當然要一步一步，如果唔係佢地會覺得好困難而失去興趣架喇~

對於小學或以上既小朋友，我會每一堂都留有一個空間比佢地。例如：今次彈單手，如果小朋友練得快，可以鼓勵佢地係老師教之前自己練雙手，到學琴時，如果小朋友真係彈得到，咁佢咪可以有一種「超越」既感覺，而且都可以建立一種自動自覺機制。當然，再指出唔啱或者彈得唔咁好既地方，佢地就會知道自己有邊到唔夠好，針對性練習。

以上都係一d見意同大家分享，最重要都係父母要先堅持，子女就會跟住學。因為我媽媽都係好堅持，雖然佢唔識音樂，但好有耐性聽我彈琴，咁樣都好足夠!

哈哈~好長氣tim~