英華女子中學 VS 聖士提反女子中學

Candy925

舊年揀呢兩間學校時, 都諗咗一陣子, 最後以個女性格決定, 因為個女比較活躍外向, 所以揀咗SSGC做自行第一, 如果個女性格文靜, 會揀YW.

Candy925

回覆 Mbaby 的帖子

其實作為父母最清楚自己小朋友性格，要心散，任何環境都可以心散；至於讀唔讀到書，亦唔一定全靠外在因素；學校比到嘅係老師同教學質數，但唔會全部學生在同一環境接受同樣教育就一定有同樣嘅成績，所以我揀學校唔係只著眼讀書及成績，配合小朋友性格發展，好多時課外部份都係學習過程。

至於最重要視乎小朋友性格，其實係好簡單，如果外在環境同佢性格唔夾，佢較難適應，我相信愉快學習，個個都知上到中學一定辛苦，但最起碼小朋友心底裡喜歡環境氣氛，再認識一些性情相近嘅朋友，咁課堂課外嘅學習或問題，都容易積極地找到解決方法。

仲有，最好帶小朋友一齊去聽學校簡介會，除咗內容，學校環境，遇到嘅師生，都能夠比小朋友感受同選擇，特別係當所揀嘅學校在各方面都相近時，小朋友嘅性格同選擇就更為重要。

雖然好多人都著重學校DSE成續，但老實講，我個人嘅看法係入U率高唔等如自己小朋友就入U機會高，當學校成績去到某個水平，兩間學校相比相差嘅百分率其實真係唔太重要，重要嘅係學校整體提供到嘅教學環境，學習氣氛，校風等等，因為人係有個人差別同唔同能力嘅，唔同範疇都有高有低，成績高低都唔能夠單方面歸功或歸咎於學校。而去過兩間學校簡介會，的確感到英華較著重學業成績多於活動，而SSGC則兩樣都重視，（SSGC並非活動教學）；當然，以英華呢幾年要重建校舍亦係考慮之一，學生活動範圍以現在校舍相比，SSGC一定優勝。

所以在我看來，兩間學校分別不太大，重要係適合小朋友性格，雖然六年嘅中學生涯好快就過，但我想個女過得開心，佢活躍好動，就等佢有個多姿多彩嘅中學生活啦，人生日後好多回憶，好多朋友，都係源自呢幾年。