讀有一條龍中學的小學的無奈

Candy925

今年過來人。
你呢？

Candy925

我個情況都係無奈，不過唔知同你嘅無奈同唔同。

我校中學未至於好top，水準都唔錯，今年都有狀元，不過課程改革中，作為家長睇唔通。

女想讀女校，如果佢鍾意男女，我就未必會外闖，如果直升當然有一班同學一齊開心d，但講真，好多家長都只打算讀1-3年，之後轉IS或出國，我哋擔心學習氣氛受影響，因不打算短期內送女出國，如直上，試考慮身邊同學每年少d每年少d，佢讀書心態相信都會受影響。既然打算留港讀書，何不選擇一所學校以及同學（大部份）都認真搏嘅學習氣氛？！雖然女成績唔係top，去其他學校未必就表示有競爭力或叻，起碼提供一個更適合佢嘅環境，日後成績如何是後話，反正求學係過程，成績唔係一切，就算成績唔好都有好多因素，唔代表乜都冇學到。

以上係決定放棄中學學位向外闖的主因。

至於在小學的支援，當然可說完全沒有，學校一早已講明，唔揀中學向外闖，如結果唔好，返來叩門，應該唔洗諗！呢類學校，可以想像唔鼓勵學生外闖，所以任可有關升中資訊，除咗教統局指定要發放嘅資料外，絕冇其他，好似banding，你唔會知自己細路屬band幾，適合咩學校，往年升中派位結果等等（每年總有少數學生外闖），完全冇嘢可作參考，感覺係孤軍作戰，事事靠估，直情好似自閉症咁；個女慘d，仲返緊學，大部份同學都揀直升，有同學老師會問佢，而佢又唔係最top嘅學生（即係個個都知你有資格出外考神校嗰d），佢都唔知點講好，有時都替佢為難，班主任同好多都師都知佢外闖，我哋冇考直資，全靠自行同派位，佢自面試到派位前都冇任何新消息，學校每逢有人問及升中，佢都唔知點講，好彩佢個性樂天，順利過渡。

仲有，呢一年，我兩公婆完全冇同個班主任交談過一句，佢（同學校）知呢個學生唔直升，從來冇人同我哋了解/溝通過。所以喺EK見咁多家長分享，大家學校又比咁多意見，真係好羨慕架，我哋只有憑EK資訊同自己分析，仲有個別家長分享意見，捱到放榜。就連自己FB都唔想提，因為學校大人細路朋友都多，又唔想咁高調表達外闖，個女仲要返學，真係幾難捱架。

好好彩，放榜日結果係自行第一志願，一家人都真正鬆了一口大氣！一定有人想知女成績如何，我哋冇得問冇比較所以唔知banding，只可以話級十五左右。本來想繼續低調，但睇到呢條題，好貼切，而且大局已定，所以有感而發，一次過寫咁長。亦希望同未來有相同處境嘅家長分享一下，呢場仗，我哋要做嘅準備工夫的確不能少，加油啦！

最後其實我想講，揀學校真係最緊要適合自己小朋友性格，女小學好啱佢，中學都應該啱佢性格。讀書真係唔係只有成績，路唔係只有一條。入唔到最鍾意嘅學校未必係損失，得著可能在後頭。希望大家有個開開心心嘅暑假！

Candy925

Candy925 發表於 14-7-19 14:19
我個情況都係無奈，不過唔知同你嘅無奈同唔同。

我校中學未至於好top，水準都唔錯，今年都有狀元，不過課 ...

唔好意思, 睇完更多嘅post, 我諗我攪唔清一條龍/直屬/聯繫.
我女小學是有中學的私小,
我只想分享有自己中學唔揀而外闖所面對的過程同經歷.
希望冇誤導大家.