點樣可以令小朋友謙虛d?

Parisienne

原帖由 preciousstone 於 10-6-5 11:00 發表
我個女讀緊K2, 老師話佢學習能力就高，不過就好鐘意誇獎自己，叫我教導吓佢。點樣先可以教到佢謙虛d？我平時是用贊的方式鼓勵佢學習，好少踩佢，導致佢而家好自大，又好勝，點算呢？ ...

中國人教育覺得唔謙虛就等如驕傲、沙塵。
外國人教育就無所謂謙唔謙虛。小朋友識答，老師就讚。唔識，就教，鼓勵你學。

K2-3小朋友係自我表現最强、最好勝嘅時候。
有時一味認叻，想突出自已唔出奇。甚至佢地會將現實同想像聯在一起分唔出。所以會〝吹水〞唔抹嘴！

我諗唔駛太膽心。亦無理由專登踩佢比苦頭佢吃啫! 只要大人平時賞罰分明，小朋友慢慢就會培養到自我價值觀。

或者請老師舉出實質例子，點為之〝誇獎自己〞先？
-成日話自已好叻乜都識?
-定係笑其他小朋友唔識、又或者接受唔到自已錯，一定係人地錯呢？

以上兩點好不同。

其實身教亦有幫助。
人人都會錯，有唔識嘅答案。就算父母有錯，都要講對唔住，唔識就問人。

如果好叻時人地表揚自已就要多謝人。

同佢玩遊戲唔好讓佢，要公平地玩，輸得多自然懂得認輸。但如果佢贏就真心地讚佢叻。

唔好向細路面前道人不是。

平日唔好順口開河乜都誇張地讚一餐 (如: 嘩 !食哂碗飯好〝叻〞呀！......嘩！自已着鞋好〝叻〞呀.......嘩!囡囡條裙好〝靚〞呀！...)

Parisienne

原帖由 preciousstone 於 10-6-7 14:00 發表
多謝詳細的回覆，我小朋友就唔會笑其他小朋友唔識、都可以接受自已錯，不過就當老師贊第二個同學的時候，她也會大聲說自己都可以做到，想老師和同學知道她一樣叻。又或者當老師問同學仔問題，同學仔要時間思考，佢就大大聲話：我識 ...

咁你囡囡真係咁醒都無辦法喎...
如果話佢好勝又唔係，因為佢可以接受自已錯。
佢又無笑人地唔識，即係無因為自已叻就存心嘲笑別人。
咁無乜唔妥啫。最多係鍾意表現自已。

似乎佢比同班小朋友較叻。
唔知佢讀嘅幼稚園係唔係好open mind ，定係較傳统呢？因為有D幼稚園會安排每一位小朋友都有權發言，最緊要肯講，培養自信，獨立思考，唔會只有一個標準答案。多以討論形式進行課題，人人有份參與。咁樣就唔會出現什麼答得快又唔得，人地答咗自已又無得答，話自已都識又顯得唔謙虛.....你個女咁醒，可能呢種學校較合適。

聰明嘅小朋友係會想表現自已多啲。
好難教一個四歲小朋友明明識又唔准答，明明快過人又唔准講，然後教佢其實咁樣係唔啱！小朋友只會混淆不清，難定界綫，誤解謙虛=唔可以表現自已，識都唔好咁快講，人地答咗你就唔好出聲....咁先至大方得體....

我認為最多只係教佢要守規矩，有禮貌。

四歲小朋友難得心中有團火，大人千其唔好戊戊然淋熄個火。不如留意下可以讓佢多啲發揮嘅學校啦！