星級爸﹕坐牢與上學

hog.wash

Dear All

uncleedward 講道別又點少得我。等我臨走爆啲料俾你哋知。呢條友仔認屎認屁，又話識呢個；又話識嗰個，查實如果唔係因為我，佢點會識咁多人。

話說佢中年失業，見佢咁慘(你咪信佢話自己可以担担抬抬，實情係担唔担得，抬唔抬得，正一病壞)又見佢早年屈蛇過倫敦匿埋係唐人街旺記幾年，識幾個唔鹹唔淡嘅ABC，就介紹佢上山做看更替工囉。哈，咁就俾佢識咗好多人。唔知係唔係啲有錢佬靈舍寂寞鍾意揾人傾計，抑或孤寒啲心理醫生錢，佢一陣話誠哥約咗佢飲茶，傾吓點教仔。實情佢都冇仔，點教人？一陣又話「你家吓杰」嘅伯爺約佢食晚飯，傾吓美國最新遺傳科技。實情佢樣樣都咁粗疏，冇樣係强項，聽佢點就唔慌唔杰。

好似頭先落更，想揾佢去飲茶，佢又話唔得，話應承咗15樓嗰個個女係劍橋教書嘅吳生跑步(咦，嘜而家劍橋安老院咁先進，搞埋一人一大學添咩？)我哋班friends最初都唔信佢，諗住呢條友得個吹字，直至有一次港督府搞個唔知係團拜定乜鬼，唔夠人手叫埋我呢班二打六去幫手先得知真相。嗰個 uncleedward 自己嚟開工就好啦，重帶埋兩個女嚟添煩添亂。兩隻嘢自細都冇爺教啦，好似馬騮咁通處走。點知當我經過一個黑人同一個心口插支美國旗仔嘅鬼佬就俾我聽見個黑人咁問(講番轉頭都多得佢喺咁迫我學英文，而家有時俾啲鬼佬捉去唱karaoke都頂得兩咀My Way ！可憐佢頭兩個秘書就俾佢迫迫下連婚都未結。咦，唔啱數。餐館佬何來秘書？佢講啲嘢你哋咪認真，當笑話聽就算。)講番個黑人問：朋友，嗰個跛跛吓隻脚仲要半蹲咁同uncleedward 個大女玩緊嘅老人家係邊個？喺旁邊帶往 bowtie 吹緊口哨緊 uncleedward 個細女嗰個又係邊個？

喺喇，唔可以同你哋講咁多啦。受阿嫂所托，要幫手住 uncleedward。阿嫂話佢呢排神神化化，成日口中唸唸有詞。乜嘢 Evie、茱迪、安妮、心兒，全部都係女人名；又平日都唔多講粗口，但口中唸唸有詞時又常常媽媽聲，有啲古怪。佢話最近有個唔知乜名嘅人講過男人最衰三樣嘢。佢老公已經衰咗兩瓣：少年得志，中年頹廢。唔想佢衰埋最後一瓣：臨老入花叢。叫我咪俾佢搞三搞四，幫佢緊啲。見阿嫂字都唔讖多個，最多識啲冧巴。見佢咁慘，只好幫幫佢，所以要同你地講byebye啦。

[ 本帖最後由 hog.wash 於 11-1-20 16:07 編輯 ]