- 在線時間
- 312 小時
- 最後登錄
- 23-7-19
- 國民生產力
- 3464
- 附加生產力
- 44848
- 貢獻生產力
- 0
- 註冊時間
- 07-11-25
- 閱讀權限
- 10
- 帖子
- 27193
- 主題
- 12557
- 精華
- 0
- 積分
- 75505
- UID
- 168291
 
|
十年樹木，百年樹人，意思係教育屬於長遠投資，必須有所承擔。港府推行十五年免費教育講咗N咁多年，到依家仲係唔湯唔水，咪就係因為缺乏承擔囉。
施政報告話就話提出由二○一七/一八學年起全面落實免費幼稚園教育，可惜做啲唔做啲，半日制學生可獲資助三萬二千九百元，而全日制及長全日制學生嘅資助額分別只較半日制多三成及六成，未能補貼全部學費，估計半數幼稚園仍需交學費。大家話嘞，咁點算係十五年免費教育？唔怪得被批評係「假免費」喇。
即係咁，本港幼兒教育比較複雜，幼稚園分半日制、全日制同長全日制，又有牟利及非牟利之分，要一刀切提供資助，的確有啲麻煩，但就算係咁，都唔係港府推卸責任嘅藉口。正所謂，有教無類。所有人都有接受教育嘅權利，當局點能夠將部分學生拒諸門外呢？教育界人士炮轟當局忽略全日制及長全日制幼稚園學生需要，唔係冇道理架。
唔怕唔識貨，最怕貨比貨。澳門十年前已經全面落實十五年免費教育，學生只要入讀公立幼稚園或已加入免費教育學校系統嘅私立幼稚園，一律毋須繳交學、雜費，可以講係雨露均霑。點解人哋做得到，香港做唔到呢？港府究竟有冇認真檢討係咩原因呢？咪話太一叮踢爆，香港推行十五年免費教育拖拖拉拉，唔係因為幼稚園情況複雜，而係因為港府唔肯承擔。
根據施政報告嘅建議，就算係半日制幼稚園，亦只有七至八成學生獲學費全免。有兼辦半、全日制嘅幼稚園校長預告，由於租金高企，加上資助額超過一半須用作教師薪酬，校方難免要將租金轉嫁家長。即係話，真正能夠獲學費全免嘅學生可能更加少。仲有吖，隨着日後不斷增加全日制學額，需要交學費嘅學生只會愈來愈多嘅咋。
講起唔知好笑定好嬲，香港討論免費幼兒教育十幾年，今屆政府拍晒心口話要全面落實，點知最後又係淪為一場笑話。冇計喇，港產官僚冇嘢叻，最叻就係吹水，施政藍圖描繪得愈美好，愈令人失望，市民都見怪不怪咯。
教育係興邦之本，港府連落實免費幼兒教育都搞到唔湯唔水，仲講乜嘢「適度有為」吖，「適度無能」就真，唔怪得今次施政報告被評為歷來最差嘅一份喇，叮！
|
|
發表於 16-1-16 14:35
