呢日在網上foreignpolicy.com睇到一篇文章，講及美國大學之中，邊間有最多中國學生。記者據美國「自由訊息法案」（Freedom of Information Act），向國土安全部取得F-1簽證（學生簽證）數字，因為海外學生到美國留學之前，須先取得學校取錄通知，憑通知到美國大使館/領事館申請F-1簽證，故此從數字可推算大學之中國學生人數。經一番計算後，美國最多中國學生之大學可排名如下：
（一）伊利諾大學（Urbana-Champaign）（即范思浩、梁劉柔芬母校）、（二）南加州大學（劉慧卿母校）、（三）普渡大學、（四）西北大學、（五）哥倫比亞、（六）密芝根州立、（七）俄亥俄州立、（八）UCLA、（九）印第安納、（十）UC柏克萊、（十一）紐約大學、（十二）賓夕凡尼亞州立、（十三）明尼蘇達、（十四）西雅圖華盛頓大學、（十五）阿里桑納大學、（十六）密芝根大學Ann Arbor、（十七）波士頓大學、（十八）伊利諾理工學院、（十九）Rutgers（新澤亞州州立大學）、（二十）得薩斯州大學──達拉斯、（二十一）威斯康生大學──陌地生、（二十二）UC聖地牙哥、（二十三）卡內基梅農大學、（二十四）紐約州立大學Stony Brook、（二十五）Syracuse大學，排第一之伊利諾大學何解有咁多中國學生？原來該校刻意開發生源，校內電視轉播美式足球比賽時有埋普通話旁述，對中國學生招呼妥當，香港學生留美想學埋普通話，到伊利諾最易搵到中國女友！印第安納大學位於Bloomington，因有太多中國學生，現在出版咗一張中文報紙叫做Blooming Times，「人民日報」唔知會唔會遠征美國，出一份「環美時報」之類呢？嗱，上述25間最多中國學生之大學，得排第5位嘅哥倫比亞係長春藤大學，可見以中國學生考試之叻，入美國私立名校都唔係咁容易。
發表於 16-1-11 09:04
