我個仔返playgroup發狂!到時返幼稚園點算?

catlover2001526

佢而家剛滿兩歲!每星期返一次playgroup，一位家長陪同一起上兩小時!
佢可以有本事狂喊，喊足兩小時! 第一堂我地已經兩個一起陪佢，佢非常非常抗拒!第二堂我地都係兩個一起陪佢，結果還是一樣!第三堂個老師話佢情緒太激動，叫我地帶佢出課室 ，係校內既有蓋playground度玩!(實情係佢嚎哭聲大到令老師不能上課，因為佢把喊聲超大......)
如是者，第四堂我地放棄無再帶佢入課室，點知第五堂佢仲退步到連學校門口都唔肯入，佢同我老公係學校門口爭持左成個鐘!本來我老公想抱起佢行入幼稚園，點知佢用條腰向後咬，又來回向左向右狂擺，結果要放返佢係地面，如是者大家拉來拉去，期間佢不停喊住話「驚驚」、「唔返學」，直至我話你一係行入學校，一係上對面個警察叔叔架車，佢先話返學，但係仍然一路喊，一入左去就疲倦到睡著了!

我都唔知佢驚咩!問佢佢又亂答，一時話驚哥哥(佢係呢班8個小朋友入面係最大果個!)，一時話驚唱歌(佢地一排隊就唱﹕踏步!踏步!寶寶要踏步......)，一時話驚貓貓、狗狗(幼稚園當然無貓狗，而且我屋企養貓，佢又成日行街時見到人地放狗話要同狗狗一起行!無可能係呢個原因，佢胡說! )
補充一點﹕如果係係幼稚園既PLAYGROUND玩，佢一D問題都無，即使同場有其他小朋友玩，佢都唔會話要走/驚!

令我最頭痛係佢唔係好似其他小朋友咁喊兩喊飲泣就算，佢可說係進入瘋狂狀態，勁大聲喊、坐然起行發狂向幼稚園反方向狂奔!如果你摟著他唔放佢走，佢就一路喊一路跳 ......而家上PLAYGROUP係有父母陪住上都係咁，下年9月，即係10個月後就要自己一個返幼稚園一個人上堂!我都唔知點算??????????

我歸結出我個仔係有齊下列3大條件下就會發狂﹕
1. 係一個室內環境
2. 有一班大人同小朋友
3. 我地同別人之間會有互動

我曾懷疑佢有「幽閉恐懼症」，但係佢搭LIFT又無野，仲主動撩同LIFT既人玩!係幼稚園，我帶佢入一個空課室，佢自己一個玩玩具，完全無問題!但係一聽到班小朋友唱歌及排隊入黎，佢就即刻好似日本仔打到黎咁放低玩具衝向我身邊一路喊一路話要走......

各位有無類似既經歷? 點做先好?  有無人個仔都好似佢咁激? 返左幾耐學先適應?

[ 本帖最後由 catlover2001526 於 10-11-16 15:18 編輯 ]