Dr.T 在此 (Hello, Dr.T speaking... 續集)

小ice

DR T,
你好!有事想請教你!
小兒2歲半多,兩個月前開始變得越來越難管教, 懷疑佢係咪有"病"?過度活躍症等..
以下係小兒的問題:

1,有時唔鐘意望住人講野, 有時望有時唔望,有時我抱住佢面對面問佢野,佢對眼兩邊望咁答我,叫佢望住我對眼講野佢唔肯,唔熟的人問佢野都係咁,平時玩佢就望住同我講.

2.冇時停,精力旺盛,坐bus會覺得好悶,多數無耐性坐,要我不停和他講野,坐一陣不停對落車..係playgroup裡也是,雖然佢會坐係自己位置上,但覺得無聊就會坐到軟皮蛇咁,係裡面佢比較不合作,好有自己主見,唔鐘意玩或佢覺得悶或己經識既野佢會選擇唔玩,如果叫佢玩佢會扭計和喊!!鐘意的活動佢咪聽話囉!係堂上佢好古靈精怪,好像想引人注意佢咁..又或者覺得坐係度悶,自己唸d野出來玩..佢性格好像唔可以悶得咁..專注力方面似乎佢對果樣野有冇興趣..我覺得佢比較唔專心囉..上堂佢會好留意身邊的環境有d咩野..係家裡佢鐘意我同佢講故事書..講好耐都得果隻..但佢又唔肯自己一個睇!一定要我讀給他聽!有時我講到口水都乾,就會爸爸接力..(不過爸爸多數講得唔好聽佢就會走..)

3,情緒起伏大,很易喊很易笑,成日發脾氣,有時心情好會係度大叫,成日做d古怪動作引人注意佢!有時會為左一d事而好執著!好像有時坐姨姨架車去街,但回程時因姨姨有事,要改坐第二個人架車,如果那一刻佢想坐姨姨的車佢會一直堅持!坐上第二個車唔鐘意,一直扭計和大喊!失控!!不停說要坐姨姨車!喊足半小時!直到落車情緒才慢慢冇事...佢間唔中會因一些小事而大吵大鬧好耐時間!!

我地忽視佢d唔好行為,佢又做多d..再唔係又係度發脾氣...不停試我..係佢乖既時候讚佢,佢又特登做唔好既行為,好反判!

4.很"痴"身(我全職湊佢,平時只有我和他)

5.學野方面都ok,顏色,形狀,數字..細細個教佢幾次己經識晒,鐘意睇書,但人際溝通方面比較弱,(我覺得佢比較自我,無禮貌)語言方面無問題,已懂句子說話,有時鐘意改晒d歌詞..(搞笑的說話)同埋想像力好豐富!

6.他禮貌方面也令我很頭痛!叫他叫人,佢唔叫都算,教他如果唔想出聲的話可以向人家點點頭或揮手都可以,人家問佢野,佢會向人家起"飛腳"!好無禮貌,我地都唔係咁..有時人家問佢野,佢唔鐘意答人就特登轉身唔采人!係車度又係咁,叫他小心隻腳唔好踢到人,講完仲即時用腳踢人(細細力)好反判!究竟係呢個年紀的問題,定係有其他問題呢?我好想知!用過好多方法都唔得..
pls help!!thx!!我兒子係咪有問題呢?

[ 本文章最後由 小ice 於 08-5-18 17:50 編輯 ]

小ice

你好,又係我,之前post果段文章後,我發覺我仔的問題又嚴重左,我覺得好無助,我唔係專家唔識分扭計定係有問題,懷疑個仔有情緒病!
佢近兩個星期開始不停食手指,(以前唔會)情緒波動,好像連自己都控制唔到自己情緒咁!好像昨晚,佢隻手指被原子印整dirty左隻手,佢去洗手但洗唔甩,我話唔緊要啦,唔洗理佢佢會慢慢自己甩架啦!佢越喊大越勁,收唔到聲,我抱住佢想佢有安全感等佢冷靜都唔得,發晒顛!不停整隻手想整甩d色!好緊張,又去洗手...總之唔甩唔得!!
類似的情況多左發生,因一d小事太緊張,好執著!!我唔知係佢搵左扭計定係真係有情緒上的問題!!老師也說佢近呢個月開始係學校鬧情緒!都係小事而起,好容易喊!係學校也調皮了許多...
同埋我個仔諗野比較焦慮,多愁善感,好像同佢講一d事,佢總是會向壞處想先,假設性地問我會唔會咁咁咁....(壞處)
電視播著一個人行吊橋,佢會問我條橋會唔會斷?斷左會點?...問佢大個考唔考車牌(佢好鐘意車),佢會答唔考,因為會撞車!總之乜都係負面的!
我仔係咪有情緒病呢??

DR. T

您好!有事想請教你,希望你可以給我一點意見!
小兒4歲,由細到大他的脾性也比較情緒化和敏感!尤其係當他和我d朋友同佢的同學仔面前,會變得好情緒化,私下只得我和他時他的情緒會好好多,每每在公園遇到熟人時,他總是不自然,好多時拒絕與同學仔玩(心理又想),依賴我和常常扭計發脾氣,措d意扭計,每次都令我十分難堪..無論事前同佢講好,佢都係咁,扭計我便會帶佢回家,其實佢想同人玩,但對人又唔瞅唔睬,態度甚差!但聽回老師講,佢係學校的情況則不是這樣,只有當我在,認識的人也在時,他態度就會很差!!!對人對我都無禮貌,又粗魯,唔係扭這樣就那樣!好像帶佢返學一路上很"正常",但回到校見到同學仔,對我的態度就完全變了..我唔知點解佢會咁樣對我??呢件事令我十分煩擾,不知怎辦?試過很多方法都不行..如事前比個心理準備佢,約法三章,講故事,同佢傾計,讚佢,忽視.....
佢係咪有咩心理問題?抑或係我管教上出現了什麼問題呢?請指教!

[ 本帖最後由 小ice 於 09-12-2 10:42 編輯 ]