家庭月入/儲蓄有幾多先會去讀私人幼稚園（無學券資助）？

新人中新人

本帖最後由 新人中新人 於 24-4-18 23:33 編輯

我嘅洗費大概如下
平N：48xx / mth
補習：1840/mth
音樂：1200/mrh
游水：1000/mth
活動班：1800/mth
保險： 3000/mth

我建議如果未買樓而又未必有父母留下物業嘅， 最好兩公婆月入120000以上先考慮讀直私（不包國際）。 因為以上係N班洗費， 再上洗費只會更大， 一個月隨時2xxxx.
理智啲諗， 未買樓嘅又有細路， 最好快啲有物業保障家庭， 加大儲蓄比讀唔讀私幼更重要。 一家三口為例， 諗得讀私幼都會想小朋友係好啲環境長大， 起碼租樓都兩萬， 請埋姐姐加燈油火蠟又一萬， 我頭先講嘅小朋友洗費又一萬， 伙食當六千， 兩公婆洗費慳極一個月加埋都萬二三， 假日同小朋友出去玩一個月又兩三千， 仲有雙方長老家用聊表心意當五千， 兩公婆供份保險又四五千， 其實一個月加埋已經
七萬幾， 其餘有時儲嚟自己退休， 有啲儲嚟買樓，有啲儲嚟旅行， 有時儲嚟儲備….如果兩公婆咩都無， 月入三幾萬學人讀直私， 其實將來大人細路都慘。

新人中新人

其實我覺得講到尾就係為個細路好。 每人對於對仔女好嘅定義都唔同， 亦唔係學得嘢多讀名幼就等如佢會忽略小朋友自由自主生活。 相反由個細路完全自由任玩亦唔等如完全唔教細路。
每個家庭都有佢嘅平衡點。 我個仔n班補習， 不過每星期我地都有戶外課， 每朝都最少個半鐘自由玩， 呢啲外人睇唔到。 相反佛系父母一路出街一路教生字亦唔會話你知。
所以有時問比唔比細路讀名幼私幼， 上唔上咩咩咩興趣班其實無咩大意義， 最緊要搵到自己家庭平衡。