88 沙田循理會美林小學(2015提問)

blackholekit

我係學校老師黎嘅。我哋家長好少用baby kingdom,而我哋都冇組織家長回應網上提問，所以我自發上網睇下有冇乜嘢可以幫手解答。學校網頁當然有家長及畢業生的感言，但如果想進一步了解不妨在學生回校時間(08：10前)，問下啲家長應該會更加具體。

blackholekit

我作為老師就唔想太”硬銷”，不過講得岩我哋的同事都真係好有愛心(因為大部分老師都係基督徒)，普遍學生都好喜愛學校的老師。不過樓上家長都講得好岩，我哋位置偏咗啲同網上又少啲討論。例如我頭先收工岩岩有個家長黎註冊，佢就話去錯我哋以前美林邨的位置(我哋依家係美城苑)。因為我自己覺得我哋做得唔係太差，而網上討論真係較少，所以我今年先自發係網上睇下回答下，等其他家長可以認識吓我哋學校。

blackholekit

Sen定義比較廣泛。資優方面，我們有推薦同學參加資優學苑課程，亦有其他校本課程如寫作班，數學訓練等等。言語治療方面亦都有。對於讀寫障礙我們有功課、默書、測考調適等等。能力稍遜的同學會有額外的課程，如陽光計劃。部分級別和科目會有抽離式教學。有些級別亦會按能力分組上課。以往亦有聽障同學在我們學校畢業。三言兩語較難完全訴盡，詳細情況可以參考學校網址：www.fmml.edu.hk
在上面有一項名稱為“學生成長”，裡面有你所需的資料，看完後如有想了解更清楚的地方，可在這裡發問或致電學校查詢。不過，我個人認為照顧學習差異，不同的教學方法故然重要，不過更重要是老師願意付出時間跟進學生的需要，這方面我認為我們的老師做得不錯。

blackholekit

唔好意思我睇番前面“固然”應該係咁寫，放心我唔係教中文，哈哈。說回正題。
-除英文及普通話外，其他科目主要用廣東話，不過一至三年級有一班係普教中。有外籍老師，係敝校服事多年，今年學校於一年級推行plprw課程，一星期有4節與外籍老師上課，主要透過活動學習英文。由於我主要教數，我見到成效較表面，學生幾喜歡上英文課，而任教老師就話學生的閱讀能力有所改善。而下學年會推展到一及二年級。
-我們學校較早發展小班教學，早年亦有小班示範課比其他學校參照。而合作學習，學生參與度相對高。而専題研習，不過次數不算太多。如果問傳統教學佔多少比例，我想大概仍佔一半左右，畢竟不同級別都有些不同。出外參觀都有，我們主要會在全方位學習周(日)去不同的地方。亦有境外遊及同心同根的境外學習。不過老實說不算特別多，但也不會比普遍學校少。
要上課了，其餘問題稍後解答

blackholekit

-精英班方面，由五年級才開始分精英班。
-專題研習大概一年有一至兩次。另外，下學年會在四年級試行電子學習，希望增加課堂的互動性及發展學生的自主學習。
-閱讀方面，我認為圖書館老師推動得不錯。昨天開完圖書會，她反對其他學校“跑數式閱讀”，所以着重於鼓勵學生及營造閱讀的環境。每年她也會想出有趣的主題，推出校本獎勵計劃，當然我們亦有參加書叢閱讀獎勵計劃。另外會有親子閱讀計劃、老師講圖書、家長義工講故事、早會時生動的圖書介紹(有時學生的演出真係使我捧腹大笑)。氣氛營造方面有圖書課、早讀、超級圖書課等等。另外在詢問處有少量圖書，而課室內除課室圖書外，亦有中英文廣泛閱讀圖書。亦與不同科目合作，推廣不同的圖書。
-我冇教過小一,同事就話大概5-6樣。不過功課問題真係好複雜，有啲家長覺得少，有啲家長就覺得多。其實好取決於學生的能力(雖然能力稍遜的同學有調適，但如果要佢識做佢應該要識嘅嘢，佢仍然會做得吃力)。對於功課量方面，我個人覺得對一般學生來說，叫做合理。默書大概兩星期一次左右。
-升中方面，大概30%升讀英文中學。但每年有輕微變化，詳情可留意學校網頁。
-開放日，將在今年九月舉行，通常都在星期六。以往有不少家長觀課後，對於學校有所改觀，因此歡迎到時參觀。

blackholekit

都係架，其實親子閱讀真係好重要，我自己的朋友也是為了自己子女的緣故，自己陪小朋友一起閱讀。又如黃之鋒其實係有讀寫障礙，正正屋企培養一個閱讀環境，使他寫作能力大大改善。
另外，功課方面我有少許補充。今年的兒童議員都有提議限制功課份數，不過我個人認為其實好難純粹從多少份功課來控制功課量。我第一個諗法係“你有張良計，我有過牆梯”啫。我每次作業做4頁，做簿做10題，將工作紙fonts同spacing縮小，功課份數即可大覆減少。其實功課每科同每級的需要都好唔同，甚至唔同課題的需要好唔同，例如小三數的乘加文字題同三角形的分類的題形好唔同。三角形分類做三、四頁學生都可能只係用五分鐘，但三、四頁文字題如果唔係列式計算，我諗我自己都有排做。所以我覺得功課量，好難數字化。即使可以數字化，背後要附加好多解釋，所以最終都係教師專業判斷。
我自己比功課係咁嘅，中、英、數三個主科，數學功課大概做15～20分鐘都應該合理。而數學功課有七至八成都係tsa的水平，TSA題目籠統地大概一分鐘一題，學生功課每天則大概15～20題了。我用呢個基準比功課，我好少聽到學生同我講多到做唔哂功課，只會係長假期佢哋感覺多啲，但實質平均數比平日還少。我用呢種方法比，通常去到學期尾再要額外出一至兩張温習工作紙。所以我先覺得功課量適中，最少數學科係咁。

blackholekit

好高興可以在這裡與各位分享自己對教育的睇法，亦有機會讓其他家長認識我們學校。如有其他問題，非常樂意解答。

blackholekit

1)第一，學校的老師真的很有愛心。對我來說，我有一班好同事，大家工作十分融洽。對於學生來說他們有一班好老師,好多時候啲舊生都會返黎探我哋，或者返黎幫手，甚至返黎分享，例如最近一期校訊就有講我們的舊生(沙田區傑出青年)返黎學校同師弟妹分享。第二，學校很願意嘗試不同的教學方法。例如，早八、九年便開始推行小班教學，中文科推行喜閱寫意，英文科推行plprw,數學科以前曾參加中大合作夥伴計劃，現在參加教育局支援計劃，來年嘗試推行電子學習。當然每年共同備課都設計出不同的課堂。講咁多主要係想講學校課程願意改變，而改變的目的就是為了讓學生學得更好，對我來說有這一夥心已經很重要。第三，學校普遍的閱讀氣氛和運動的氣氛不錯。老實說當然有個別學生不喜愛閱讀或運動，但整體來說算是不錯。
2)首先，我要聲明我沒有教過小一，所以我未必能準確掌握(因為我見小一學生的時間就只有課前、小息或放學的時間)。以我觀察就沒有太大適應問題(可能暑期已有兩天適應課程，到我見到他們時已經適應了)，我就沒有見小一學生不願意上學，亦沒有聽聞太多欠功課問題，基本上我見他們大部分都返得開開心心。我估適應問題，其實好睇幼稚園，因為幼稚園的程度都好參差。最近小一收生，有啲小朋友非常精靈，但有個小朋友洗手間都未能自己去，所以你話會唔會完全銜接問題呀？我諗真係好個別。我諗作為家長，最重要培養好學生的自理能力，例如執好書包、安排好做功課的習慣和環境、守規、個人整潔等等。至於學業，在他適當時間學適當的事物就可以。至於功課及考試深淺，我諗不用太擔心。正如之前所說，功課七成多是TSA的題型，TSA主要考學生的基本概念。深的題目不是沒有，不過佔的比重不多。而考試的情況亦相當類似。

blackholekit

其實ok架啦，因為幼稚園冇統一的課程(我係舊校試過有學生k3已經背好乘數表)，基本上全都會再教一次，不過可能會根據學生的情況教快少少。其實根據課程，二年級上學期先學三位數。所以基本上可以話冇要求，不過當學定基本的順數、倒數、十以內的加法組合亦可以。

blackholekit

其實咁講，小學基本上對入學前的學生沒有任何知識上的要求，因為現時政府仍然對幼兒教育沒有強制要求，所以以上說的内容基本上在小學會教多一次，不過可能會按學生的情況把課程調快少許。問題在於幼稚園的學習內容差異好大(我係舊校試過有學生，k3幼稚園已經幫佢背好乘數表)，又好難話幼稚園乜都唔好學，所以小學初期內容同幼稚園差不遠。而教育局的課程指引，二年級先開始學100以後的數，在這情況家長應如何是好呢？我認為按生活的需要就可以了。例如數字的順數、倒數，十以内的加法組合，時間和日期，物件長度，按邊把圖形分類等等(其實已經係小一的內容)，都係學生生活接觸到的東西，早啲認識亦冇妨。但無須刻意教授，反正小學都會再學。

blackholekit

其實咁講，基本上小學對於入學前的小一生冇任何知識上的要求，因為政府還未強制學生必須完成幼兒課程，而幼稚園的教育內容很參差(舊校有學生試過k3就背乘數表)，所以教育局的課程指引基本當小一生什麼也沒有學過，所以以上家長所講的(小二才學100以後的數)小一都會再教一次。不過學校一般都會按學生的程度調整進度。那麼家長怎算呢？我認為幼稚園教的，而學生又能吸收到就由他們學吧(畢竟幼稚園也要安排學習內容)。有些數學內容讓學生早點認識亦無妨，如順數倒數、10以內的組合、貨幣、長度、時間、日期、基本圖形等等(這都是小一的内容)，因為這些東西都是他們生活接觸到的，但當然都要考慮孩子的能力，如果未能學到就由他們在小學才學習都可以。

blackholekit

哈哈，我以為覆唔到，不斷重複了原來來了後面這一頁。plprw係英文故事教學計劃，課堂裡會有外籍老師、英文老師及教學助理一同教學。以我所知他們會透過好大本的圖書進行教學，並透過故事進行不同的活動學英文，如角色扮演、唱歌、製作食物等等。我始終不是教英文科，不過學生好像學得很愉快，而英文老師就覺得學生的識字量和寫作能力有所改善。

blackholekit

學校要求學生考測分數50分為合格？60分，因大部分小學都係60，不過分數其實同試卷深度有關
C亦是合格？C是及格，D才不及格
有無吾計分的科目？咁講，影響學生名次的主要中、英、數、常。但每科本身都有評核及分數。
課後或課堂上個別主科老師會安排堂上功課時間？唔太肯定你的意思。逢星期二、四最後一節課是導修課，主要用來做功課。至於課堂中安排功課時間，個別老師會有。例如我自己如果該天有兩節數學堂，通常我會安排十至十五分鐘給學生做功課。另外，課後有功課輔導班，或老師按個別學生需要留校指導功課。
低年级小班教學约30人一班？其實全校一至六年級都大概25人班(p5~6精英才會大概33人一班)
如果我回應唔到你的問題，歡迎再問。
另外，明天12/9學校有開放日，時間兩點開始，地點係本校(記住我哋係美城苑而唔係美林邨),有興趣家長可以黎參觀一下。