88 沙田循理會美林小學(2015提問)

bimakko

就這一貼，請問有冇讀美林小學的家長可分享入讀後的情況^_^

blackholekit

我係學校老師黎嘅。我哋家長好少用baby kingdom,而我哋都冇組織家長回應網上提問，所以我自發上網睇下有冇乜嘢可以幫手解答。學校網頁當然有家長及畢業生的感言，但如果想進一步了解不妨在學生回校時間(08：10前)，問下啲家長應該會更加具體。

ausumsun

原帖由 blackholekit 於 15-06-06 發表
我係學校老師黎嘅。我哋家長好少用baby kingdom,而我哋都冇組織家長回應網上提問，所以我自發上網睇下有冇 ...

好老師！

薯蛋頭

我參觀了88網大部份學校, 最有驚喜的是美林小學, 看見有很多有心的好老師, 只是位置比較偏而且小人討論, 所以睇低左一線。

blackholekit

我作為老師就唔想太”硬銷”，不過講得岩我哋的同事都真係好有愛心(因為大部分老師都係基督徒)，普遍學生都好喜愛學校的老師。不過樓上家長都講得好岩，我哋位置偏咗啲同網上又少啲討論。例如我頭先收工岩岩有個家長黎註冊，佢就話去錯我哋以前美林邨的位置(我哋依家係美城苑)。因為我自己覺得我哋做得唔係太差，而網上討論真係較少，所以我今年先自發係網上睇下回答下，等其他家長可以認識吓我哋學校。

hannahhh

請問你地學校對於Sen 學生支援大嗎

blackholekit

Sen定義比較廣泛。資優方面，我們有推薦同學參加資優學苑課程，亦有其他校本課程如寫作班，數學訓練等等。言語治療方面亦都有。對於讀寫障礙我們有功課、默書、測考調適等等。能力稍遜的同學會有額外的課程，如陽光計劃。部分級別和科目會有抽離式教學。有些級別亦會按能力分組上課。以往亦有聽障同學在我們學校畢業。三言兩語較難完全訴盡，詳細情況可以參考學校網址：www.fmml.edu.hk
在上面有一項名稱為“學生成長”，裡面有你所需的資料，看完後如有想了解更清楚的地方，可在這裡發問或致電學校查詢。不過，我個人認為照顧學習差異，不同的教學方法故然重要，不過更重要是老師願意付出時間跟進學生的需要，這方面我認為我們的老師做得不錯。

raindroponroses

多謝老師你在這裡解答家長問題。我家在同一屋村，所以地點對我而言是perfect的，因此雖然大家都看低一線，我仍想多了解。

—想請問貴校除英文科外，是否其他都是廣東話教授？中文是否普教中？有沒有外籍老師？如有，一星期有多少堂呢？
—幾年級開始分精英班？
—教學方面，可不可以說比較傳統，即以老師講學生聽為主，還是有其他較活動的形式，如探研專題研習等啟發學生多思考呢？另會否多參觀探訪等活動呢？
—學校如何推動學生多閱讀呢？
—功課量方面，平均小一生連改正有多少樣呢？默書是每星期也有嗎？
—升中方面，有幾多%能升Band 1英中呢?
—會否有開放日，或升小簡介會？

不好意思，有太多問題？但若得到老師您回覆，實在不勝感謝！

blackholekit

唔好意思我睇番前面“固然”應該係咁寫，放心我唔係教中文，哈哈。說回正題。
-除英文及普通話外，其他科目主要用廣東話，不過一至三年級有一班係普教中。有外籍老師，係敝校服事多年，今年學校於一年級推行plprw課程，一星期有4節與外籍老師上課，主要透過活動學習英文。由於我主要教數，我見到成效較表面，學生幾喜歡上英文課，而任教老師就話學生的閱讀能力有所改善。而下學年會推展到一及二年級。
-我們學校較早發展小班教學，早年亦有小班示範課比其他學校參照。而合作學習，學生參與度相對高。而専題研習，不過次數不算太多。如果問傳統教學佔多少比例，我想大概仍佔一半左右，畢竟不同級別都有些不同。出外參觀都有，我們主要會在全方位學習周(日)去不同的地方。亦有境外遊及同心同根的境外學習。不過老實說不算特別多，但也不會比普遍學校少。
要上課了，其餘問題稍後解答

raindroponroses

非常感謝，不急，有時間再覆！

blackholekit

-精英班方面，由五年級才開始分精英班。
-專題研習大概一年有一至兩次。另外，下學年會在四年級試行電子學習，希望增加課堂的互動性及發展學生的自主學習。
-閱讀方面，我認為圖書館老師推動得不錯。昨天開完圖書會，她反對其他學校“跑數式閱讀”，所以着重於鼓勵學生及營造閱讀的環境。每年她也會想出有趣的主題，推出校本獎勵計劃，當然我們亦有參加書叢閱讀獎勵計劃。另外會有親子閱讀計劃、老師講圖書、家長義工講故事、早會時生動的圖書介紹(有時學生的演出真係使我捧腹大笑)。氣氛營造方面有圖書課、早讀、超級圖書課等等。另外在詢問處有少量圖書，而課室內除課室圖書外，亦有中英文廣泛閱讀圖書。亦與不同科目合作，推廣不同的圖書。
-我冇教過小一,同事就話大概5-6樣。不過功課問題真係好複雜，有啲家長覺得少，有啲家長就覺得多。其實好取決於學生的能力(雖然能力稍遜的同學有調適，但如果要佢識做佢應該要識嘅嘢，佢仍然會做得吃力)。對於功課量方面，我個人覺得對一般學生來說，叫做合理。默書大概兩星期一次左右。
-升中方面，大概30%升讀英文中學。但每年有輕微變化，詳情可留意學校網頁。
-開放日，將在今年九月舉行，通常都在星期六。以往有不少家長觀課後，對於學校有所改觀，因此歡迎到時參觀。

MASAYA

blackholekit 發表於 15-6-12 18:04
-精英班方面，由五年級才開始分精英班。
-專題研習大概一年有一至兩次。另外，下學年會在四年級試行電子學 ...

同意，跑數式閱讀計劃對培養閱讀興趣沒幫助，原本培養閱讀興趣應在家中進行，但有些家長不明白閱讀重要性，學校幫忙營造閱讀氣氛是有心辦好教育的做法

blackholekit

都係架，其實親子閱讀真係好重要，我自己的朋友也是為了自己子女的緣故，自己陪小朋友一起閱讀。又如黃之鋒其實係有讀寫障礙，正正屋企培養一個閱讀環境，使他寫作能力大大改善。
另外，功課方面我有少許補充。今年的兒童議員都有提議限制功課份數，不過我個人認為其實好難純粹從多少份功課來控制功課量。我第一個諗法係“你有張良計，我有過牆梯”啫。我每次作業做4頁，做簿做10題，將工作紙fonts同spacing縮小，功課份數即可大覆減少。其實功課每科同每級的需要都好唔同，甚至唔同課題的需要好唔同，例如小三數的乘加文字題同三角形的分類的題形好唔同。三角形分類做三、四頁學生都可能只係用五分鐘，但三、四頁文字題如果唔係列式計算，我諗我自己都有排做。所以我覺得功課量，好難數字化。即使可以數字化，背後要附加好多解釋，所以最終都係教師專業判斷。
我自己比功課係咁嘅，中、英、數三個主科，數學功課大概做15～20分鐘都應該合理。而數學功課有七至八成都係tsa的水平，TSA題目籠統地大概一分鐘一題，學生功課每天則大概15～20題了。我用呢個基準比功課，我好少聽到學生同我講多到做唔哂功課，只會係長假期佢哋感覺多啲，但實質平均數比平日還少。我用呢種方法比，通常去到學期尾再要額外出一至兩張温習工作紙。所以我先覺得功課量適中，最少數學科係咁。

MASAYA

覺得功課多唔止係老師責任, 我女學校都好多家長話功課多, 但好多情況係小朋友要等家長放工先開始做, 或者有家長坐係身邊先肯做, 咁做其實好多時間處於等待狀態, 係咪算依賴其實好難講, 每個人既心理發展都好唔同, 但從小學習自理, 好多事有能力做, 小朋友就多數肯自己做, 養成讀書係小朋友責任而且有能力自己做, 功課就唔會等到夜晚先做, 做功課等於溫習當日學校教既野, 其實連溫書都可以慳返, 只溫默書就可以

另外, 上小一前有基本閱讀能力, 就可以應付上堂吸收, 唔駛學術超前, 小學野應該留返小學先學, 小學前搞好自理先, 然後再講家校合作

薯蛋頭

辛苦老師了！30%英中，其實在88校網已位列中游！深信仍有很大進步空間！期待！

blackholekit

好高興可以在這裡與各位分享自己對教育的睇法，亦有機會讓其他家長認識我們學校。如有其他問題，非常樂意解答。

Qooie@@

雖然我孩子是91網, 第一次見到有該校老師作答、非常感受你們的熱誠, 亦很感動, 希望貴校越來越多人認識, 培育更多好孩子。

raindroponroses

實在非常感謝老師你那麼詳盡的回覆，真的感受到你對學校的認同，對學生的熱誠！

還有兩個問題，還望老師有空可以回覆一下：
１）你最欣賞　貴校的是甚麼？
２）就你接觸的學生，他們在幼小涵接時有沒有遇到困難呢？因為就我所看過的一些朋友子女的功課和考試題目，實在很艱深，無奈之餘，也不知道如何可以幫助準備，以能順利過渡。現時我唯一很重視也很堅持的每天伴讀，希望他們能培養閱讀的興趣，但就沒有針對學術的一些訓練。

blackholekit

1)第一，學校的老師真的很有愛心。對我來說，我有一班好同事，大家工作十分融洽。對於學生來說他們有一班好老師,好多時候啲舊生都會返黎探我哋，或者返黎幫手，甚至返黎分享，例如最近一期校訊就有講我們的舊生(沙田區傑出青年)返黎學校同師弟妹分享。第二，學校很願意嘗試不同的教學方法。例如，早八、九年便開始推行小班教學，中文科推行喜閱寫意，英文科推行plprw,數學科以前曾參加中大合作夥伴計劃，現在參加教育局支援計劃，來年嘗試推行電子學習。當然每年共同備課都設計出不同的課堂。講咁多主要係想講學校課程願意改變，而改變的目的就是為了讓學生學得更好，對我來說有這一夥心已經很重要。第三，學校普遍的閱讀氣氛和運動的氣氛不錯。老實說當然有個別學生不喜愛閱讀或運動，但整體來說算是不錯。
2)首先，我要聲明我沒有教過小一，所以我未必能準確掌握(因為我見小一學生的時間就只有課前、小息或放學的時間)。以我觀察就沒有太大適應問題(可能暑期已有兩天適應課程，到我見到他們時已經適應了)，我就沒有見小一學生不願意上學，亦沒有聽聞太多欠功課問題，基本上我見他們大部分都返得開開心心。我估適應問題，其實好睇幼稚園，因為幼稚園的程度都好參差。最近小一收生，有啲小朋友非常精靈，但有個小朋友洗手間都未能自己去，所以你話會唔會完全銜接問題呀？我諗真係好個別。我諗作為家長，最重要培養好學生的自理能力，例如執好書包、安排好做功課的習慣和環境、守規、個人整潔等等。至於學業，在他適當時間學適當的事物就可以。至於功課及考試深淺，我諗不用太擔心。正如之前所說，功課七成多是TSA的題型，TSA主要考學生的基本概念。深的題目不是沒有，不過佔的比重不多。而考試的情況亦相當類似。

hsiehevonne

謝謝老師的回覆，讓家長們可以更具體了解學校細節
想請問老師專業的數學科。上小一之前需要具備什麼程度的數學概念？
目前K2進度教至50以內數字，10以內加法橫式運算。Thanks!