迦南幼稚園 家長分享

法子

emilylin,
你囡囡講野都好叻喎,實"乙水"得人好開心!!係呀,你囡囡叫咩名呀~
我囡囡係好慢熱的,佢好想同小朋友玩但永遠唔會主動叫小朋友.對住我就好多野講;街外人就好cool.    
唉~放4:45真係好趕呀!我想過找人湊,又maybe搭school bus...都要睇下囡囡10月佢適應成點再決定. :wink:  :wink:

法子

somimi,
係呀,我搬左響青衣,囡囡番學夾唔到時間,所以唯有轉校
其實大坑東係間好好既學校,我都好唔捨得,但係今次真係冇法子 :-|
以後多d入黎傾下計la~

法子

emilylin,
你有冇上過Cannan 個homepage?你覺唔覺佢個hp成日都冇乜update架?10年如1日咁..   

emilylin

法子
係呀,成日都係個D野,冇咩轉變,唔通真係要五十年不變,我諗要同學校反影吓先,記住寫落手冊先.....
係呢你教半日架??,我見你有時下午6:00幾就上梨喎,咁你要湊囡,如果要OT咁點算呀??
你個囡"慢熱"呀,相反我個囡就"熱情"D,佢同D唔熟D人(無論係小朋友或大朋友都啱KEY架,佢第一日返學(即家長唔可以陪佢一齊上堂,我諗住佢會喊,點知無喎,佢返屋企仲話其他小朋友喊咗好耐好醜怪,又話我奶奶仲咩咁快去接佢,真係比佢笑死,下次搵日你帶你個囡同我個囡玩呀,可能佢地會啱KEY架,我個囡叫"愷薇",英文名叫"EMILY",你個囡叫咩名呀??
今日我有個朋友比佢D"根德園"K2D測驗卷我睇,佢個仔今年係"根德園"讀K1,佢專登問人影印DK2測驗梨睇,佢比睇,我當堂睇到眼都突 ,好深呀,已經要配字,比個字你要畫出個樣物品,又有D短句子要填D字上去(冇得"簡"),英文仲利害,有一段文字要依他指示用圙畫出正確位置,我想請問你係我大鄉里唔知K2咁要求定呢間真係深....聽講測驗係突擊架,我想問你K1多數教D咩同有D咩要求,等我知道點教個囡,我而家教佢,佢都唔係好上心,有D教咗好多次佢都唔記得,好似"橙色"教咗好多次佢都係唔知咩色,但其他佢有興趣或新鮮野,電視搆做咩電視劇佢一睇就知連主角叫咩名都知,有時都唔佢笨定專登唔記 ,唉,真係比佢激到"啤"一聲

法子

emilylin,
係呀,我做半職架,不過好多時都做左成日去...
依家如果我OT就通常叫mammy幫我湊左番屋企先.
但如果轉左黎Cannan後,我就要一腳踢..因mammy住唔近依頭架!
根德係出名好深,所以不可同其他幼園相談.基本上K2係唔會教得咁深架!
迦南課程已算是中上程度,小朋友應該應付得到.
K1多數係訓練小肌肉,練下手指仔力,eg:玩泥膠,為將來執筆寫字作基礎
亦會連線,寫一;1等等...

emilylin

法子
唔該你先,咁我都定D,可能我冇咩耐性呀,都係慢慢梨,我老公成日生仔容易教仔難,等佢仲話想生多個,一個都咁煩啦,你有冇發覺而家好似係D父母讀書多過仔囡,我見D父母排隊交小學報名表,一早就去排,都係想D仔囡將來好D,而家D父母真難做,係呢你有冇諗住比個囡學D野,我諗住比佢學琴,但而家未夠年齡收,我個囡好鍾意唱歌同彈琴,唔知係唔係我陀住佢成日去唱K有關呢

法子

emilylin,
依家既家長,個個都好緊自已個小朋友,希望比最好既佢地.做家長都唔易呀!
我囡囡都好中意唱歌,同你囡囡一樣,成隻開籠雀咁!因為我地都係同道中人~~~~好中意唱K..keke.....(我地可以齊齊去唱K~哈哈)依家我囡囡學緊芭蕾舞,之前學過操體,英文班,swim.....玩玩下咁la!~
係喎~未介紹tim,我囡囡叫Bovie ,短髮小龍女一名,個個都係叫佢英文名的.請指教呀~~~       

emilylin

法子
哇,你個囡囡原來學咗咁多野啦,佢幾多歲開始學呀??芭蕾舞係邊度學??,幾錢呀??,一個星期學幾堂??(我真係多問題,希望你唔好介意吓),你連體操咁都學埋,勁呀,點解冇繼續學??
有機會一齊去唱K,你有冇同個囡去唱過??,我就未試過,但我D朋友試過,我有時同朋友去唱K都見到有D小朋友係度,唔知洗唔洗錢呢??
你個囡個英文名好特別,好少人改,點讀架,你改架??
係呢12/9你有冇去投票呀,你係唔係功能組別,可以投兩張喎,你投邊個呀(八掛咋,冇意思架),我投梁耀忠呀,最唔低都係何秀蘭,唉,遊戲就係咁有輸有嬴

scorpion

Hi... 你好
我想問你迦南好唔好?學費幾多? thanks............

emilylin

scorpion
我個囡剛剛開始返咗2星期,都幾好,d老師都好nice,第一個星期都有打電話同我傾吓囡囡d野,而家都ok啦,我聽有d bk媽咪話迦南教得都幾深
學費$1450.00,茶點一學期$800.00(包生日會),書簿費$1350一學期
你想報呢間,你小朋友幾大??

emilylin

  

法子

emilylin,
佢3歲開始學,係牛頭角果邊,一個星期學一堂,$50一堂.體操係玩玩下,比呀囡出身汗咁,因為玩左一期之後又係我就唔到時間,所以冇再join.
Bovie 2歲開始就跟我去唱K,小朋友唔洗錢的,依家好多Twins kids song 0岩佢地唱架!除左kids song, 囡囡仲識唱好多大人歌,奇洛里維X回信;丟假;飲歌;放生..........~_~
Bovie 個英文名係我爸媽+老公+我齊齊改的,我覺得英文名比中文名更漂亮呢!發音係好似Movie咁,但頭2個字係Bo, 即 Bo vie...希望你明la~!
梗係有去投票la,我全屋勁唔中意民x聯,超級黑人僧呀!
我地個個都支持民主黨/派,而我地選擇"分散投支",平均分配來投票.我投左何俊仁,老公投李永達,唉..何秀蘭真係好唔抵呀,下次一定要踢C9玉落車!!!

emilylin

法子
Bovie 好叻呀,識唱咁多歌,連D大人歌都識,勁呀,有機會真係要聽吓,Bovie學芭蕾舞一堂$50都幾平喎,如果你轉咗過梨荃灣,點抽身呀??我都想比個囡學芭蕾舞,但唔知荃灣邊度有得學,同收幾歲,今日學校有張通告問人參唔參加舞蹈班,一個月四堂$400,我想比佢學但D時間唔係好夾,逢星期四下午5:00至6:00,呢段時間好監介,我奶奶要煮飯都唔得閑,如果早D我一定報,之前已有通告問學唔學畫畫,又係時間唔夾,唔知點解學校唔可以安排係星期六日呢,真係要打電話問吓主任,正因為咁所以想係出面搵吓有冇D啱個囡學,你有冇好提供??
係呢你買咗校服未??你個囡知道要轉校有未反應呀??
今日打電話去學校問老師個囡呢兩星期點,大致上都OK,但有時會好大聲同D同學仔講野,又唔識分享,不過老師話慢慢就會好D,
仲有我老公有個朋友係中銀做,佢話投票日規定住荃灣一定要投周梁淑怡,我話唔係要投民建聯咩,佢話唔同地區投唔同喎,唔怪得知個譚耀宗有咁多票,做馬,真係好唔公平,但我覺得佢點知有冇投比指定人呢
    

法子

emilylin,
你過獎la~!Bovie 好中意果個ballet class,因為係星期日,所以都可以就到.我都想知荃灣青衣邊度有得學ballet &畫班.因為我都唔清楚邊度有呀~如你知道就報料我知la~

emilylin

法子
今日,我見到我老公個堂細妹,佢係演藝學院讀跳舞,而家都有係出面教小朋友,佢話我知佢係荃氿綠楊青年會教小朋友跳芭蕾舞同中國舞,我問佢仲收唔收生,佢話十月開始收,我同佢講如果開始收就通知我,到時有資料話你聽,我仲問佢荃灣有邊間好,佢話王曼仁幾好但太貴,李賽鳳就有好多表演但次次表演d衫都要買過,仲好貴,一對跳舞鞋係深圳買二十,佢就買到$100,真係搵笨
係呢轉校d野攪掂未??,中秋節諗住同個囡去邊??

法子

emilylin,
你堂細妹係綠楊教,學費幾$一堂?
我仲未買校服呀,遲2日先買.hehe..
Emily 讀邊班?果班有幾多人呀?
Bovie 讀LK D班,有2x人..究竟係2拾幾呢......下次再問下先!
我到依家都未知第一日番學要帶咩書,咩薄?又要問下..

中秋節...真係冇諗過去邊玩,或者番阿媽度"似"餐~Yummy!
你呢?有咩節目?會唔會外遊呀~~

emilylin

法子
哇,你今日咁早呀,放咗工啦??,佢話要等通告出咗才知,但不是太貴,學費一期期計,大約一堂$50左右,佢話暑期班個陣都係$30蚊到,好平咋,佢地係YMC非牟利團體,所以平D,我今日打個電話去問佢地話聽日開始有章程派,我會叫我老公去攞,攞完話你聽,
Emily讀NA班,佢個班有22人,兩個老師,即一對11,我都可以接受,佢下午班總共幾班??我都唔知N1有幾班,好似有四班,(見佢有D班我估咋)
應該唔洗帶書喎,Emily第一日返學淨係帶"吉"書包同毛巾盒,但K2可能唔同,佢派咗書啦??定係你去買校服時一齊派呢??
中秋都未決定,要返奶奶度食飯,食完可能同Emily上山頂,個日Emily新曆生日,我阿媽佢地同佢做舊曆(25/9),
仲有一個節目就係要同emily去做智能測驗

emilylin

法子
朋友介紹荃灣南豐一畫室,我下午打電話去,佢話收3歲至4歲,4堂$200,每堂1個鍾,有星期六,日,你有冇興趣,今日放工上去睇吓先,有資料話你知

法子

emilylin,
我今日番晏麻,所以咪上來睇下先law~你有芭蕾舞&畫班的detail 記得報料過我呀~Thx
10月 K2應該要帶功課/書上堂架la~書薄我已經囉左,因為Bovie係10月插班,我要同佢備下課;亦要跟番Cannan功課,所以我上星期特登去Cannan拿左書薄先,到10月番學就容易D跟上.
毛巾盒係Cannan的?定是帶"私伙"?

禧媽媽

法子
我好8掛 !!!
係呢, 你搬左青衣邊樹?? 因為我過多2個月都會搬去果到!
所以想問定資料幼稚資料, 呢間學校有冇校巴架???