各位特殊障礙小朋友既媽咪,開學順利嘛?

珀珀,慧慧媽

唔好意思呀,想問下各位如何同班主任講自己小朋友d障礙呀??

我開學第一日同老師講我小朋友有讀寫障礙,不過未有report(因我讀私校要自己同政府拿report給學校),但老師只係話每個小朋友都有唔同,要遲d睇下我個小朋友有無特別需要先作安排喎
其實我想問妳哋d老師係會點同家長合作架??
另我個小朋友現在轉介去精神科睇adha架(這個未同老師講) 加上小朋友左耳又有小小聽障 點解好似所有唔好的事都發生在他身上似的

Skywan

你千萬不要這样唸, 小朋友都會感到吾開心, 對你兩個都吾好!

回想當初未正實小朋友是 ADHD時, 老師經常投訴佢大部份同學又吾鐘意佢,因為我都吾知佢系ADHD日日返來都罰佢又鬧佢, 大家都吾開心壓力緊有。

后來正實佢有ADHD 后, 立刻同老師講, 希望”家校合作” 幫佢改善有關情況....

當然啦! 你吾好期望咁高, 因老師都系人, 所以個個老師反應都吾同架啦!
有些老師知道后會體諒你同你合作, 有些當然…依然故我啦!

不過準之講左好過無講。

~仔仔媽咪~

原帖由 珀珀,慧慧媽 於 09-9-9 09:46 發表
唔好意思呀,想問下各位如何同班主任講自己小朋友d障礙呀??

我開學第一日同老師講我小朋友有讀寫障礙,不過未有report(因我讀私校要自己同政府拿report給學校),但老師只係話每個小朋友都有唔同,要遲d睇下我個小朋友有 ...

咁又唔好咁灰心住~講多問題我仔都唔少野架~!我仔有自閉傾向、言語發展遲緩、動作協調障礙、學習障礙、ADHD...

可能我仔好細個已經有自閉傾向問題,同埋我仔D脾氣差又成日打人,基本上唔駛我開聲講,D學校老師已經好知我仔有問題囉,嗰時我都係照講,正如治療師所言,你講出黎順便睇下間學校/老師有無心想教我仔呢類小朋友囉.

查實我地又唔可以對老師期望太多,始終老師咪又係人一個,佢仲要一個對住卅幾個學生,而且我地呢D小朋友隻隻款都唔同,咁都需要時間俾老師慢慢去適應同諗方法去幫囉.

查實最緊要係老師肯主動同家長溝通,大家一齊諗方法幫小朋友,呢樣如果老師做到,已經算係成功咗同埋係家校合作囉.

至於支援,多數都係安排言語治療師俾小朋友(如果佢言語上有問題既話),佢有學障讀寫困難,學校多數會安排佢默書測驗考試時有多D時間考,同埋考試多數會獨立咁考,等佢有番多D專注,如果佢有ADHD同埋有聽障問題,試下要求老師安排小朋友坐响最前面個位,等佢無咁易受其他人影响,可以專心上堂,同埋老師又會易D睇住佢囉.

同埋老師管教你小朋友都要配合番佢特殊問題,要賞罰分明,教既方法亦要變通一下,呢D就係好需要家校合作去多D溝通囉.大致上都係咁.

唔好咁擔心啦,要加油~~~有咩心事或者疑難可以隨時黎呢樹大家一齊傾一齊呻下架~~~學似我仔上年小三班主任咁話,我地呢班家長都需要地方去抖下氣同得到勵勉同支持架~!

珀珀,慧慧媽

仔仔媽咪,
多謝妳的鼓勵,我都希望學校可以同我哋合作多d溝通,可能係剛開學老師對我小朋友未了解啦~~
另想問下妳個小朋友去那裡做治療架,我想找一些治療比私小朋友希望有所改善呀~~
我個小朋友一開學就唔見了本作業啦 妳小朋友會唔會有這情形架,時常都係唔見這唔見那,又唔緊張自己d物品,返來後我仲緊張過他,唔知幾時先好d呢,有無一些方法可以改善一下架~~
對唔住,太多問題了如妳覺得我很煩可以不理

~仔仔媽咪~

原帖由 珀珀,慧慧媽 於 09-9-11 08:56 發表
仔仔媽咪,
多謝妳的鼓勵,我都希望學校可以同我哋合作多d溝通,可能係剛開學老師對我小朋友未了解啦~~
另想問下妳個小朋友去那裡做治療架,我想找一些治療比私小朋友希望有所改善呀~~
我個小朋友一開學就唔見了本作業啦 ...

傻啦~咪亂諗,我好鐘意同人傾囝囝呢D問題架...始終我地班小朋友係非一般細路,有時你同出面既人講,人地又唔會明囉.呢樣我都好理解.

我仔都係咁架!成日唔見野,同埋佢之前書包亂到好似個垃圾桶咁,永遠唔識得將D通告工作紙呢D一張張既紙擺好,D書又東歪西斜,D千年垃圾同通告又會藏哂响書包底同暗格度...又成日唔見哂D筆同擦膠,甚至連筆袋都唔見埋...

我今年開始硬性要求佢一定要執好書包,原本我早幾年都係用A4文件袋俾佢擺通告同工作紙,但發現佢真係唔識得好好地ZIP D紙入去,所以今年我都係買咗個file係用夾既形式黎擺文件既,仲要用F4 size嗰隻,等個仔唔會夾得唔好D通告會出哂界整爛囉.

同埋又係唔再俾佢用筆袋,因為佢真係跌咗都唔知,又好易扎咗响書包底,呢次我就買個大大個筆盒,四四方方又係硬盒黎,依家個仔總算無唔見個筆盒,開咗學咁耐,噚日至自首同我講話佢唔見咗舊擦膠...咋...

同埋我都要求個仔每日放學前一定要清櫃筒,唔可以留任何物品同書本响學校,要佢執靚個書包同埋寫齊手冊至準放學,呢幾日我放學都要同佢檢查手冊甚至的番佢上課室度double check多次寫齊手冊未,至准佢離開學校.暫時都可以控制到佢既...佢書包都仲整齊囉.

我仔依家係無去私家度做治療,始終我又無得番工,無咁既經濟能力俾到佢去學其他野或做任何出面既訓練,我都係自己DIY咁訓練個仔咋.以前我仔就有去一間治療師度做治療,如果你需要既,你可以PM你個EMAIL 俾我,我再send俾你啦.

珀珀,慧慧媽

仔仔媽咪,
妳都好是全職媽,我係在職媽來的,所以比較辛苦

想問下妳的DIY訓練是什麼來的,可否交流一下

~仔仔媽咪~

原帖由 珀珀,慧慧媽 於 09-9-11 11:24 發表
仔仔媽咪,
妳都好是全職媽,我係在職媽來的,所以比較辛苦

想問下妳的DIY訓練是什麼來的,可否交流一下

我都係無番工一年左右,無計,都要自己親自睇實個仔囉,再加上我爸身體唔好,所以都無可能交個孫俾佢湊.

DIY意思係靠自己咁解,即係所有訓練所有方法都靠自己落手落腳去做去諗囉.

MARSTEN

你地既小朋友係咪有file,入第一輪填埋有特殊需要架??咁學校第一輪收定大抽獎先入到呢?? 我而家煩緊仔仔選小一既野,因為佢global delay,而家都成日要人幫呢幫路,但係佢唔會打人亦唔會發脾氣

今日去開放日,有家長問佢地會唔會收呢類小朋友,而家d學校有d唔係好想俾其他家長知,一有呢類問題就草草答完就算,佢話:"政府派到黎我地無理由唔收",咁即係第一輪佢唔會收係咪?? 佢間每班得十幾人咋~ 不過我覺得呢間學校好好,但對佢地無咩支援呢類小朋友而有少少扣分

~仔仔媽咪~

原帖由 MARSTEN 於 09-9-11 22:03 發表
你地既小朋友係咪有file,入第一輪填埋有特殊需要架??咁學校第一輪收定大抽獎先入到呢?? 我而家煩緊仔仔選小一既野,因為佢global delay,而家都成日要人幫呢幫路,但係佢唔會打人亦唔會發脾氣

今日去開放日,有家長問佢 ...

查實好坦白講句,基本上間間學校都無實質既支援俾到我地呢班小朋友囉.

佢地所謂既支援都只係每級有一班係特殊班,即係我地呢類小朋友同其他讀唔好書或者行為情緒有問題既小朋友group埋一班,嗰班有兩位班主任睇實,課程又淺D,功課又分幾次黎做(普通班可以一課書既作業係一次過交,但我地D仔就唔係,一日一頁).同埋考試咪一係個別咁考(甚少會咁做),一係俾多少少時間佢地完成.實情你話有無實際既支援,例如社交小組嗰D,真係微乎其微.

當年我仔小一派位,我係無填到'有特殊需要'架,當年我都係好似你依家咁,為此而煩惱,最後我老公叫我唔好'多手',所以我至唔填,但最後攪珠派咗嗰間北官我係無俾個仔讀,因為我一知道佢派咗嗰間之後,我都專登打電話去同佢學校既主任傾,我好坦白講我仔既問題,佢地只係一聽我仔有自閉傾向同講野唔叻,都仲未講我仔會打人呢點,個主任已經卻步,一輪咀話佢全校得一個特殊老師,係應付唔到咁多特殊小朋友,之後,我至自行叩門叩咗我仔依家讀嗰間.

實情之後教統局每年响依家開學差唔多既時候都會派位心理學家黎學校觀察小朋友,學校就會將佢地認為'有問題'既小朋友交俾呢位心理學家再進一步觀察,然後個心理學家會個別約見小朋友同家長,跟住有需要既話,會幫我地班仔去安排去排期見精神科醫生或者治療之類,實情我仔嗰時無填到'6'字(特殊需要),但見咗教統局個心理學家後就開咗file.

因為中間我係無再帶個仔去精神科度覆診,所以教統局個心理學家就幫我地去排番兒童精神科,之後學校都係無咩支援,只係某程度上會就番我仔既特殊需要囉.呢D都好額外.

12312

下星期 小一第一次正式中文默書啦.

常在坤

其實係咪最好睇睇個本全區小一本校網睇下D有特殊老師占主流老師幾多好?

珀珀,慧慧媽

原帖由 12312 於 09-9-17 13:43 發表
下星期 小一第一次正式中文默書啦.

我個囡下星期都有中文及英文默書,希望唔好又唔合格啦

~仔仔媽咪~

原帖由 常在坤 於 09-9-18 01:04 發表
其實係咪最好睇睇個本全區小一本校網睇下D有特殊老師占主流老師幾多好?

查實無話最好既,但都會睇下囉,因為就算佢地標明特殊老師佔既人數幾多,都唔代表間學校真係咁support到我地呢班友仔,最好都係聽下D口碑,唔係話嚴定點,都係好睇佢地既教育理念同埋係咪真係咁有耐心去教養我地呢班小朋友囉.

基本上自己揀啱嗰幾間,逐間打去搵主任同校長傾兩句,坦坦白白講話囝囝有特殊問題,睇佢地叫你黎佢間學校度讀吖,定係往後退係咁間接直接叫你唔好送個仔黎佢度讀.

~仔仔媽咪~

原帖由 珀珀,慧慧媽 於 09-9-18 08:43 發表

我個囡下星期都有中文及英文默書,希望唔好又唔合格啦

我仔下星期都中英文默書喇...呢幾日學校中文課都有中文預默,我仔預默咗幾次都肥佬番黎,無哂心機咁...希望到正式默書時能夠KEEP番住成績,可以合格啦.

12312

阿仔日日都在托管班預默一部份, 但 D 字好醜樣呀.

Ruby_Lau

原帖由 ~仔仔媽咪~ 於 09-9-11 22:36 發表


查實好坦白講句,基本上間間學校都無實質既支援俾到我地呢班小朋友囉.

佢地所謂既支援都只係每級有一班係特殊班,即係我地呢類小朋友同其他讀唔好書或者行為情緒有問題既小朋友group埋一班,嗰班有兩位班主任睇實,課 ...

請問什麼途徑可以知道學校有特殊班呢? 在南區有沒有呢?

報小學時是否應填上"特殊需要"呢? thanks!

~仔仔媽咪~

原帖由 12312 於 09-9-18 13:49 發表
阿仔日日都在托管班預默一部份, 但 D 字好醜樣呀.

佢依家仲有無做SI同訓練手眼協調呀?同佢做番啦,等佢對位對得好D,寫字又靚D.

~仔仔媽咪~

原帖由 Ruby_Lau 於 09-9-19 22:51 發表


請問什麼途徑可以知道學校有特殊班呢? 在南區有沒有呢?

報小學時是否應填上"特殊需要"呢? thanks!

查實要知道間學校有無,都係好聽嗰間學校既家長講番出黎咋,通常如果間學校又係用成績黎編班,咁多數最差嗰班就做做特殊班囉,你又可以打去問學校了解,問佢地學校會唔會話編呢類小朋友去個別班/加強輔導班度上,千祈咪講話係特殊班,講真莫講話家長唔鐘意聽,學校都係麻麻地想聽到呢D字眼架咋,最好都係問佢地會有乜支援先,等你可以了解下.

查實報小學時填唔填'特殊需要'...填咗政府會每位特殊學生俾一萬蚊學校作為支援囉.但嗰一萬蚊間學校係咪真係用落個特殊學生度,就另作別論,我仔當年係無填呢項,個人感覺填唔填都分别不大囉.

12312

無呀, 做邊d動作好呀?(我還返晒比 老師啦)
今日去學校開會, 順手問下小朋友在學校的情形. (老師話要做多些 "社交" ) 點攪好呢? (暫時在學業上都跟得上, 但好小出聲--無膽)

~仔仔媽咪~

原帖由 12312 於 09-9-20 00:02 發表
無呀, 做邊d動作好呀?(我還返晒比 老師啦)
今日去學校開會, 順手問下小朋友在學校的情形. (老師話要做多些 "社交" ) 點攪好呢? (暫時在學業上都跟得上, 但好小出聲--無膽) ...

咁你囝囝依家寫字係無力至寫得唔靚吖,定係係咁飛格同D字上闊下窄?

至於社交方面,我覺得囝囝啱啱去到一個新學校新環境,我地班仔又要需要更多時間去適應環境同人,同埋佢地社交唔掂,佢地都好驚好不安囉,所以查實呢D又唔急得,你一急,囝囝又會好大壓力會亂哂籠架喇.

或者你試下放鬆心情,俾個態度俾你囝囝睇,原來番呢間學校係一個好開心既事,呢度係一個好開心既地方黎,媽咪又同老師friend又同同學friend,等佢少咗份戒備心先,得閒好似懶係唔覺意傾下閒偈咁問下亞仔响學校發生咗D咩開心有趣事,問下佢間學校有咩好野,例如D裝修呀、老師同學校工校長等既人點樣呀,試下氹下囝囝自自然然講少少出黎,唔講唔緊要,唔駛迫,等佢慢慢習慣適應下,等佢無咁怕同人社交時,佢自然會主動番D,不過到時都要輔導下,始終小學多咗咁多同學同老師,人際複雜咗,自然好容易有D唔好既社交經驗,呢D都要教下佢點面對點處理囉.往後呢D先至最重要.