星光熠熠耀聖保羅

hui3328

隔牆有耳:星光熠熠耀聖保羅2010年09月08日
有貴族直資之稱嘅聖保羅男女中學附屬小學,噚日傍晚舉行入學講座,有 2,000家長出席,唔少達官貴人到場,場面星光熠熠。香港奧運第一金「珊珊」李麗珊同老公黃德森孖咇現身,珊珊話朋友子女喺度讀,讚學校教得好,所以想大女希皚入讀。

黃德如同西醫丈夫梁宗存一齊出席聖保羅附小入學講座。

副局長許曉暉由上海返港即刻趕去學校。
李麗珊兩公婆出席講座
聖保羅每年小一只收 150人,舊年 14人爭一個位。珊珊金牌都攞到,但名校學位卻坦言冇把握,「冇得擔心,我做媽媽要做嘅嘢已經做晒」。要入呢啲老牌名校,細路真係要文武全才先有機會,珊珊話冇特別培訓希皚:「自然啲好。」咁佢兩公婆真係崇尚自然,「星期六、日帶佢去玩吓獨木舟、滑浪風帆,體育方面唔係好擔心」。父母係風帆運動員,希皚遺傳良好基因,今年 5歲已識得游自由式、蛙式同背泳,仲學過跳舞同彈琴。希皚呢啲優才好多學校搶住收啦,珊珊少擔心。
唔少家長都係放工趕過嚟聽,民政事務局副局長許曉暉噚日下晝同成班副局、政助遊完上海返香港,火速趕到會合老公一齊聽講座,八方見佢上氣唔接下氣,真係好趕。佢同珊珊一樣,聲稱冇催谷個女,只係畀佢學吓畫畫同彈琴,仲要自己教。
聖保羅校方話明,會睇家長可否配合到學校一齊教,唔可以只係靠老師,許副局咁鬼忙點算好?佢話會盡量努力,好似份報名資料都係開夜車親自準備。好多高官都送仔女去國際學校,佢透露開過家庭會議,結論係覺得本地學校適合囡囡多啲。教育局孫公如果搵佢做副局,而唔係送個仔去國際學校嘅陳維安,就唔使成日畀人挑剔。
校長否認面試背乘數表八方噚日仲見到轉咗做中醫嘅無綫前新聞之花黃德如,佢個醫生老公梁宗存都到。佢話囝囝 Cedric今年讀 K2,後年先升小一,今次嚟學吓嘢先。喺講座上有家長問校方,面試係咪要背乘數表,校長李端儀否認,表明唔考學術問題。校方會見所有報名小朋友,安排佢哋分組玩遊戲,實情係趁機「陰」吓佢哋有冇王子病、公主病,「睇佢哋有冇搶嘢、有冇禮貌、霸住玩具、唔執拾,如果有得揀,我哋當然會揀已學識禮儀嘅細路哥」。

w_y

我今日都有睇報紙呀, 話 san san 金牌都拎到, 但係學位都無把握...笑 c 我. 如果佢 2 位千金都入到, 睇怕一位 4 百萬都應該唔係幾夠用.

Sumyeema1

李八方講野好抵死

JKTL

舊年ｏ既星星仲多。。。