可否幫忙睇下我個仔是否自傾?

Roseyuen

我個仔而家27個月, 細個的時候已經覺得佢有d自閉, 大大下自己及身邊的人覺得唔係, 之前做綜合評估的時候, 個姑娘話佢有幾個 point 中左A仔, 咁我又開始好心煩, 想各位過來人幫下手睇下係咪? 我個仔有以下問題

1) 言語遲緩 (講到10個單字左右)
2) 認知遲半年, 表達遲9個月
3) 怕羞, 但叫佢與其他人握手會照做, 有時又會主動與其他大人/小朋友握手及hug hug
4) 叫佢會望過來, 有eye contact 但個姑娘話只維持2-3 seconds
5) 專注力: 有興趣的事可以玩好耐 (30 mins), 如入錢買汽水機, 用一罐罐的咖啡壘到好高好高, 冇興趣的事, 如睇書, 做手工, 一分鐘攪掟
6) 喜歡玩門/轉轉下的東西(髮型屋出面果個), 車輪 (細個好喜歡玩, 而家間中)
7) 口部好敏感, 不喜歡刷牙
8) 偏食
9) 脾氣大/固執, 唔順佢意有時會打人


4 6 7 8 就係個姑娘話比我知係A仔的特性, 我好down, 以為冇野的事, 珼又要再面對, 不過, 放心我不會因為我不能面對現實而影響了阿仔的前途!


大家可否分享下, 係唔係似A仔呢?


而家只係做緊言語治療同排緊政府 E/S位, 今年九月先返N班做大仔(上年冇位),  好想同佢返私人S位, 但真係afford 唔起一個月成$8000, 係呢段時間可以做d咪呢? 多謝分享!

kelvin_hmlau

相信答案已經在你心中吧...

認知遲半年->建議搵埋PST 幫手...

anan3388

睇完你個 case, 我既建議係: 當左佢真"係"先咁黎諗 treatment, 捱到 6 歲前 or 佢語言發展到出黎, 先好放鬆.

諗下係咪真係 afford 唔到私人 S, 其實就算讀到幾個月都好, 起碼自己學到個方法可以知道點幫個仔.

口部敏感可以按摩, 不過係職業治療師教點做.... 或者你試下俾唔同質感既野佢咬下, 睇下佢點.

我自己都經歷左幾次以為係, 然後以為唔係既循環, 結果發覺係浪費左寶貴既訓練時間. 所以唔好聽所有話佢無野既說話, 當正佢有野咁既做就岩 (當然, 要嚴選治療既方法, 唔好信 d 無乜根據既, 做基本既幼兒導師/言語治療師/職業治療師既訓練先[我自己試過既私人訓練機構有: 領思/邁步/協康會/樂天)

若$真係一個大問題, 就要勤力 d 睇多d書, 去協康會/耀能做家長資源中心既會員, 可以借書睇, 上家長講座, 要盡快學會基本既方法

越細做效果越大, 但留意可能不會一下子進步好多, 要有心理準備, 可能好長時間無乜進步, 又突然一下進幾步.

在家中同佢玩多 d, e.g. 玩 d 最 baby 既支下, peekaboo 遊戲, 吹泡泡, 自然地多 d 眼神接觸, 令佢鍾意同人親近.  收埋 d 佢會沉迷既玩具.  重點係, 加強互動.

語言方面: 同佢講野要好簡單, 誇張面情手勢, 等佢回應(e.g. 望你/俾反應你)你先再講

佢有注意到既時候, 就多 d 描述做乜, or 物件名稱之類

加油, 辛苦就上黎呻下.

Roseyuen

Kelvin, 多謝你的一言中的!

anan3388, 多謝你的有用資料分享及鼓勵! 我昨天上了個自閉症的課程, 相信我在當中應該學會怎樣在家居做訓練

kelvin_hmlau

Rose,

見到你咁積極, 彷彿看見兩年前的自己, 一個由追求名校變成一個處處為個仔着想的人.

anan3388

同埋, 去 S 校暫托都係一個好既選擇, 睇返你住邊區, 一般協康既都有暫托, 你打去問下.  我仔仔之前都托左幾個月

同埋, 你都或者要留意一下佢會唔會有埋大肌小肌同埋感統既問題. 你可以在資源中心借到一本叫 "兒童發展評估表" 協康會出既, 你可以在當中睇返自己既小朋友既程度.  若慢左都要加強.

當初我仔仔未夠一歲識行, 我以為佢大肌無問題, 原來行只係其中一樣. 現在佢仲練緊跳同拋擲, 小肌亦在繼續練手力同埋指力中.  若你自己幫佢可能未必好知道點睇到佢有咩問題.  建議你花一些錢做初步評估, e.g. 領思可以做幼兒導師 + 職業治療師評估 (around $1000) [或者你再問下仲有無其他地方可以做], 咁你會知道佢差 d 咩, 同埋可以捉住 d 人係咁問佢地點教點 train.  職業治療師會做埋感統既問題, 或者你都可以問埋佢地 etc.

其實小朋友仲細, 真係變數仲好大, 仲有好多潛力, 我見過有些例子係突然幾個月內進左好多步的(當然也有困難既 case), 怎樣也好, 不要放棄希望.

同埋記得好好咁對自己, 找下朋友傾下計, 得閒抽離下去輕鬆下, 照顧好自己才能好好照顧仔仔 ga!

呢條路唔易行, 但努力係一定會有或多或少有進步, 加油! 支持你呀!

肥婆媽

Rose :

其實你個仔得個 27個月, 的人成日都話太細個 check 吾準, 你個仔得 27個月, 是吾是真是 check 到, 因為我都擔心我個仔有, 你可吾可以 pm 的資料比我, 在邊到做

Roseyuen

Kelvin & anan3388, 好多謝你地呢d同路人的鼓勵及支持, 有人十卜同開解, 真的可以為自己充充電!

EKME

我仔仔, 28個月, 評自傾, 我不當甚麼, 因無論怎樣, 我都會用心教他, 當然我都有看好多自閉症的書和資料!越看越感到我仔仔不是自閉!

szeszes

我仔6歲大, 才被政府兒童中心評為自傾, 我同你一樣, 好用心去教仔仔, 主要訓練仔仔語言發展

我也是看好多自閉症的書和資料, 仲要係好多都係朋友 (學校有 i 位既幼稚園教師提供) 借給我睇, 我越睇越唔覺得, 只覺得仔仔係語言發展弱, 就晚晚同佢不停咀講野, 又教佢多些詞彙,  上網提供多些圖片比佢學下認知 ... 真係明顯係有改善, 仲會主動同我講返學校入面發生過什麼事

原帖由 EKME 於 11-3-21 13:57 發表
我仔仔, 28個月, 評自傾, 我不當甚麼, 因無論怎樣, 我都會用心教他, 當然我都有看好多自閉症的書和資料!越看越感到我仔仔不是自閉!

karen2011

你有無搵人幫佢做家居訓練? 我有個朋友個仔都評了自閉。佢係等服務的期間，搵左一個有經驗的老師幫佢做簡單的訓練，包括社交、遊戲治療、口肌訓練等等。當佢排到位做訓練時，已經比之前進步好多。佢會主動同人打招呼, 說簡單的語句。

唔好錯過2-3歲的黃金學習期呀

manman2228

請問家居訓練幾錢呀?

原帖由 karen2011 於 11-3-21 16:37 發表
你有無搵人幫佢做家居訓練? 我有個朋友個仔都評了自閉。佢係等服務的期間，搵左一個有經驗的老師幫佢做簡單的訓練，包括社交、遊戲治療、口肌訓練等等。當佢排到位做訓練時，已經比之前進步好多。佢會主動同人打招呼, 說簡 ...

dada5

manman, 小心小心!
http://forum.edu-kingdom.com/space.php?action=viewpro&uid=710104

原帖由 manman2228 於 11-3-22 13:42 發表
請問家居訓練幾錢呀?

karen2011

一般$200-$300/一小時，視乎經驗。
如果小朋友做開言語治療的，特殊老師就可以補一補囉