到底咩狀況才要讀特殊小學呢？

psv

如果智力正常，有咩因素仍需讀特殊小學？係咪多數因行為問題？如只有言語遲緩及坐唔定（經常出位無時停)，認知同齡，會唔會主要因為坐唔定而被迫要讀特殊呢？
另外，其實特殊小學裡面係咪好多都智力正常嘅呢？

mckm2007

以正苦standard智商70以下，一般suggest去特殊。特殊學校都有好多種，你可以上社署website睇！

mckm2007

仲有你想知多啲學校情況，最好去參觀下。

autunmbb

psv 發表於 12-9-3 00:41
如果智力正常，有咩因素仍需讀特殊小學？係咪多數因行為問題？如只有言語遲緩及坐唔定（經常出位無時停)， ...

如果智力正常又無肢體問題，應該評唔到去讀特殊？？特殊係要教育局會根據專業人士的評估與建議，以及家長之意願才可入讀。

如果適應有困難兒童，有嚴重情緒及行為問題的學生係有d叫羣育學校的服務。

我覺得可以去問下評估中心個社工或者s位的社工了解下。

psv

有人話如果經常坐唔定(唔識安坐及等候), 到時根本無人會理認知程度或智能，就算係資優，有咁嘅屬於行為問題，一樣需要去讀特殊！係咪真呢？

Capricorn2521

回復 psv 的帖子

個人愚見，小學生坐吾定，IQ正常，會吾會係ADHD呀? 係吾係應該試吓食藥先呢?

bubufafa

我就相信冇幾多個智力正常嘅學生入智力特殊學校喇，反而見好多智力低嘅學生入咗主流學校。

psv

我小朋友仍是幼稚園階段，未讀小學，佢有言語遲緩，其他徵狀極似ADHD多過"A",如成個人無時停，口都無時停，專注力差，一做訓練就好唔合作，唔肯守規矩因無耐性等待，叫佢坐或企都會走咗去，但認知同齡、大肌超齡，相信智力無問題，但由於未夠六歲，未能確診ADHD，亦未能靠藥物，做過感統無乜用，"如有行為問題，如坐唔定，四圍走，無人會睇智力如何，就算資優，有呢d行為問題，都必須入特殊小學＂呢d說話係某機構(所有人都讚好嗰間)的高級職員同我講，令我好擔心，唔知係咪真?!我亦覺得如果因為咁就要讀特殊小學，好唔抵，難道訓練追得咁辛苦，就因呢d控制唔到嘅因素，結果都係一樣？

Capricorn2521

回復 psv 的帖子

樓主，好明白你嘅擔心。

行為管理一定要做，不斷做 (雖然成日同佢傾計同辯論個口好累)，但一定要尋求一套可治佢嘅方法。既然佢吾係蠢，一定識搵著數，家長一定要從佢hot求的東西著手控制佢。第2步係要明白有時佢地都控制吾倒自己，見到佢有努力，便當佢pass及獎勵。

第3，正如我樓上提及，如確診，可以先試藥。(我吾係鼓勵食藥，係冇辦法之中嘅辦法)。記得一個講座校長說，佢學校一個類似情況，後來要食重藥，但行為係改善咗好多。

第4，明白專業人仕嘅建議好重要，但孩子還小，仲有好多進步空間。可能專業人仕想你著緊d。

annaanna

其實我仔都令我好困擾，佢番左學係另一個人，冇我地在場O既時間，不停攪事，失控﹗但如果我同爸爸在場，佢可以好乖，我一個眼神佢已經坐定定﹗
藥又食左，行為管理已經教過，佢完全明白咩係O岩咩係錯，但往往會繼續做錯事﹗
其實咩學校咩環境先O岩佢呢？問題係佢唔係唔喜歡番學，佢唔怕被罰，因為佢好快唔記得左﹗
我係咪要搵特殊呢？但佢學術係冇問題，只係佢對住唔同O既人做出唔同O既事﹗特殊老師係咪真係會有辦法對付佢呢？以我所知，群育學校有短期課程，但要小三以上.... 我可以點做呢？請幫幫忙.....

hktkomama

其實你囝囝在唔在乎你的感受?如果佢在乎，可否同佢講佢在學校的行為使你感到唔開心。我仔仔早之前在學校都有些行為問題，後來學校有投訴，我接囝囝放學時因壓力大哭起來，囝囝見到後，佢明白佢的行為會影響媽媽。後來佢有唔乖，老師同佢講媽媽會唔開心，佢就立即乖返。

annaanna

回復 hktkomama 的帖子

我係一個好眼淺的媽媽，每次鬧仔時都會忍唔到喊... 鬧仔心痛我估大家都會明白﹗
今日我同佢講，o係學校聽校長、老師的說話就等於聽爸爸媽媽的說話，希望佢可以明白，有時諗下，佢幾時先會覺悟呢？幾時先可以做番個正常人呢？我要求唔高，只要佢o係學校都好似o係屋企咁o既表現已經ok喇... 可惜... 我壓力好大，好辛苦，究竟邊個先幫到我呢？

psv

回復 Capricorn2521 的帖子

多謝支持！第一樣完全中point, 一話有得打機，佢可以做埋動作背哂"床前明月光"，單雙數同計加數(但佢言語遲成年半)，而家好多時都係"等價交換"至肯做嘢！
第二我已將要求降到最低，但求佢肯坐定無周圍走，即使遊魂，我都讚佢！
第三我已預咗要食藥，只係無辦法中之辦法！
第四嗰d所謂經驗人士，現階段已講到佢好似無藥可救咁，又話佢連坐定都唔得，俾堂佢上都無用，就用d咁嘅藉口話一個月只俾一堂OT，慘過乞佢，如果咁正路咁叻，心諗我就唔駛嚟啦！枉為人人讚嘅大機構！問佢有咩方法建議改善坐定，佢竟然答我暫時都無辦法！可恥！
咁我可以點？連特殊機構都歧視我哋？

psv

回復 annaanna 的帖子

其實同我個仔極似，當然我嗰個言語表達及社交都未得！我都有諗過佢係咪唔鍾意讀書，一上堂就發脾氣或周圍走，問佢又會識答番我做得唔啱，但講極都照做，仲要得我一個食得住佢，其他都無人話得聽，而且古惑到睇穿咗我喺學校唔會用到任何手法叫停佢（如罸唔准玩玩具），變成只有喺屋企先至聽話，出到去又係另一個人！喺屋企可以坐低做訓練兩個鐘，但出去做訓練就兩分鐘都唔得，攪到d評估結果完全不乎實際能力！我都想知應該點做？真係好攰，又唔甘心放棄，但係做任何嘢都無幫助，感覺好似患有絕症無能為力咁！曾經聽過有種類似叫對抗型過度活躍症，唔知佢係咪呢種呢？咩都作對！不過，C6安慰我話佢識咁樣作對，即係蠢極有限啦，唔係點識同你鬥法吖！總好過成舊飯咁，踢一下先郁一下，無自己思想！真係唔知好嬲定好笑！苦中作樂！近嚟又遭受到某特殊機構嘅岐視，唔止批死話阿仔一定讀特殊小學，就連中學都批死埋去特殊，甚至批死佢將來極其量只能做一個服務員！我知我唔應該去介意，但聽完真係又嬲又hurt囉！（佢係好鄙視咁同我講，絕對唔係激將法）如果將來阿仔有成功嘅一日，我一定會多謝佢今日嘅睇死！
你小朋友係咪升二年級？喺學校有咩問題？老師有無建議？我都明白如果只因行為問題而要考慮特殊果種深深不憤嘅感覺，但係有時真係好累，無形嘅壓力好似每日都壓住自己透唔到氣，眼淚越來越容易出來，到底應該點做？

hktkomama

你唔好俾自己太大壓力，如果真的覺得好辛苦，見仔仔醫生時同佢哋講下，我之前有段時間都是，最後同仔仔的醫生講，轉介咗我看醫生，現在食緊藥，相比之前，情況穩定咗。
我估你仔仔同我個一樣，某程度上，佢哋是睇下佢同那個人的交情，如果佢同你的交情好，佢會讀你講，跟你做。但回到學校，佢同老師的交情未去到使你仔仔在乎。另一方面，佢可能是draw老師的attention,即使是罸，都叫做有人理會。

annaanna

回復 psv 的帖子

其實我唔介意轉特殊，只係怕連特殊學校都未必能接受佢O既行為問題，咁到時點呢？之前睇新聞話有位特殊學生因為上堂走黎走去，比老師縛住O係張椅度，可能因為果位學生唔識表達.... 雖然呢D 可能係個別事件，但我唔希望有機會發生O係我仔身上﹗

ivybibi

需要入讀特殊學校的首要條件係評估出黎佢的智商為70以下，唔會因為佢坐唔得，四圍行而要求你入讀的。另評估結果亦都唔會堅持要你的小朋友入讀特殊學校，最終選擇權係父母身上。
入讀特殊學校唔會比人縛住係張椅度的，就算發脾氣到有攻擊性行為，大多數老師都會想辦法令佢情緒回復平靜，真的無效就唯有報警轉送精神科；但呢D係萬中無一的事例。
小朋友有ADHD的問題，等大個一點，可以靠藥物去控制，只有搵到一間有愛心的小學，同樣可以係主流有所成就!

annaanna

回復 ivybibi 的帖子

THANKS~ 唔會因為坐唔定而安排入特殊學校，但如果學校真係容納唔到呢？我明白學校有愛心好重要，但學校話放完暑假番去變左好多，叫唔聽，話唔停，咁再包容O既小學都好難接受到佢囉....

hktkomama

會唔會剛剛放完假，心情未平復？希望佢過多一兩個星期，習慣返，可能會好些。加油！