小朋友做功課唔專心

吉蒂

小朋友三歲兩個月,讀K1日日都有兩樣功課,寫字同工作紙,日日起碼快做一個鐘,今晚成兩個幾鐘都坐係度發呆都唔做,寫寫下個5字又望去第二邊,隻手就亂寫...打手板,唔比飯食,唔淮玩都罰過,重可以點教,請大家指教,好勞氣

maria_lai

吉蒂,

我個仔宜家都係三歲兩個月喎, 佢開頭做功課時都係無心機唔想做, 有時叫我地幫佢做, 多多藉口咁. 到佢肯自己做時, 佢又求求其其咁.  我地都有鬧佢, 打手板/唔比飯食/唔淮玩又未試過既, 好似宜家就用呢d方法快左d喎.  我地都有時揸住佢隻手一齊做, 希望佢有興趣d啦.  總之係軟硬兼施啦.

過左一個星期後, 覺得咁唔係辦法, 就去同老師講, 了解下佢係學校係唔係都一樣, 但發覺係學校好d喎.  之後老師係學校就再講一次俾d小朋友聽做功課應該係點.  跟住番到屋企就好好多, 當然宜家有時都係咁, 但都比之前好了.

最近我地發覺佢有幾次自己一個做而我地唔係佢側邊睇住時, 佢會寫得好好多, 又快又好.  唔知係唔係佢覺得俾人睇住好有壓力同埋驚我地鬧佢呢樣又鬧佢個樣呢.  不過佢都係睇心情, 一時一樣啦.

唔知你個小朋友同我個仔既情形會唔會差唔多. 你有冇同老師講過呀?  你個小朋友d生字深唔深架?  你有冇問點解唔想做?  其實佢會唔會有d同你鬥氣呀?  你知呢個年齡d小朋友好鍾意同大人玩相反呀.

我聽好多朋友講佢地既仔女都唔係好願做功課, 尤其係開頭起步時.  我都好想個仔快d自動自覺做, 唔駛勞氣, 但係怕太壓迫佢時佢會產生恐懼, 以後佢會越來越唔想做架.  所以你都唔好咁心急啦, 你個小朋友都係三歲兩個月, 剛剛揸筆寫字無耐,可能佢要適應多一排, 睇多陣先再算啦.

吉蒂

maria_lai
  多謝你分享...每日同佢做功課就真係慘過行刑,一做晒當堂鬆左口氣,又唔想一做功課就鬧又打,做完話有糖食,有碟睇,真係軟硬兼施,叫佢做時又好願意自己去開枱燈,要佢自己揸筆就係唔多肯,或者,真係未自己寫到關係,我用手指指住佢個寫,就唔多願做,但會自己寫到,到我揸住佢隻手又好落力咁筆,可能,我真係心急要佢快D學識自己寫,又怕佢依賴左,又怕細仔進度慢而要讀多年

maria_lai

吉蒂,

我覺得我個仔同你個仔既情形差唔多, 我有同老師談論過亞仔既進度, 老師話佢唔算好差, 可能只係佢剛剛開始寫字未習慣, 最緊要真係唔好嚇怕佢攪到佢第日唔肯做就大件事啦.

你個仔係米2002年12月出世架? 我之前都有擔心細仔會跟唔上, 但睇睇下佢都唔係同人地差好多姐. 當然係比較之下, 好多大仔女真係係發展上會d, 但唔係代表細仔女一定差架.  我識有幾個小朋友係12月出世, 佢地係學習上完全唔覺有乜問題. 另外, 我又識幾個年頭或年中出世既小朋友, 我又唔覺佢地比起同年既小朋友叻好多姐.

所以我地都唔好太擔心, 個個小朋友既發展都唔同, 一齊順其自然啦. 如果亞仔真係能力有問題, 要佢讀多年都要架啦, 唔係咁大不了姐. 如果係都要逼佢升上去, 米攪到佢唔拖唔水, 佢越讀越辛苦.

我地一齊努力啦!