仔仔學游泳記 (Update 第十堂喇~ 考完試過關lu)

mbean

諗諗下，不如開個post黎share下仔仔既游泳進度，大家可以互相鼓勵，又可以開心下。

第一二堂既share，大家係呢度睇返啦。
http://forum.baby-kingdom.com/viewthread.php?tid=945101&page=1#pid22710181
#8 and #10

第三堂游水
仔仔係星期六上完第三堂游泳班。但係好懶，到宜家都未寫返。
好，等我慢慢寫返。

一開始既時候，緊係做返d熱身動作，拉下筋咁。

做完熱身之後，就開始落水。上堂學左少少跟腿，今次就練習返。再比下賽咁。因為我係參加4人班嘛，咁佢地就2個2個咁比賽。(所以話一對一其實有時會驚好悶)。小朋友都係比賽最有鬥心最落力，連我朋友個囡囡唔係好鍾意游水都係咁游，好搞笑。

跟住個教練就逐個人執下佢地d動作。個教練講完之後，佢地就一個一個咁做番。題外話，我都未見過仔仔咁乖 ，一叫就聽。平時如果我叫佢地做功課，都係一講就聽就好喇。

學完踼腳之後，休息左一陣，就見佢地係水跳下跳下咁，圍住圈咁做。我開頭都唔知做咩，後來問返教練先知佢地練緊個連續呼吸。仔仔話我知其實咁樣做好累。哈哈。  

做完腳，就開始教自由式o個個手，練一陣之後，差唔多完堂前，個教練就會玩下游戲。今次玩o個個游戲就係潛入水底執玩具。教練講完點呼氣同潛水之後，就會俾佢地試做。D細路又係好勇咁爭住試，不過當然唔係次次執到啦，但都勇氣可嘉。

上完堂之後，個教練通常會話返我知仔仔既進度，同埋佢有咩做得好，有咩做得唔好，要注意d 咩，又會講下點改。佢同我朋友講，佢個囡囡成日都講
“唔係呀ma” 之後唔想做練習，希望家長可以留意下，同囡囡傾下，希望佢改左呢個減弱自信心既說話。

之後就同我講佢好肚餓，跟住我地去左一齊食野 。做完運動果然肚餓d，嘻嘻。

睇睇下，原來打左咁多，下次第4堂再同大家分享。

[ 本文章最後由 mbean 於 08-7-4 22:43 編輯 ]

[ 本帖最後由 mbean 於 08-9-9 09:42 編輯 ]

mbean

之前唔係好得閒，好耐都冇update過。宜家一次過post晒先。

習泳第四堂
開頭都係做下d基本拉筋動作，但係今次要小朋友輪流帶，仔仔好興奮咁，但朋友個女女就怕羞，好搞笑。 (好彩仔仔都記得)。
跟住落水喇，雖然仔仔之前可以游到幾步自游式，但係都係得幾步，都係要慢慢黎執好d。之前教左自游式既腳，宜家教埋數拍子呼吸。其實我覺得游水最難係呼吸o個度。跟住加埋隻手既動作(我睇見都難，嘻嘻)。朋友個囡囡成日都左右不分，右手郁變左左手郁，俾你激死。做左十幾round之後，教練再逐個逐個執動作(呢d就係十人班同小人班既分別喇，佢冇呢d嘈佢都似)。

之後開始用浮板練習，游就游得幾似樣，係換氣要練多d。咁游下、執下動作，改下咁。

仲有教練有同佢地玩滑水，要佢地平浮，之後就推出去，佢地玩得幾開心。

最後就係練返個背浮，輕鬆一下就下堂了。



習泳第五堂
今次帶左支自己特勁既防晒，睇下有冇效先？

熱身o個d唔講喇。落水之後，練下踼腳，拿住浮板，踼左兩個堂，運動量越來越多咁喎。不過平日少郁動，做多d 對仔仔身體都好d。之後就要覆習返手既動作。，今日教練話要”划死水”。事後問返咩係划死水：原來就係要企係度，淨係用手爬爬爬。加埋隻腳真係全身運動。

另外加場就係朋友個細女唔聽話，結果要罰企三分鐘，佢睇住其他人玩自己冇得玩，返去之後真係聽話左。

仲有，佢地幾個人玩“水底包剪捶”，又幾新鮮，教練話係練閉氣用的。之後，教練要小朋友一個一個游返個自己式俾佢睇，仔仔一開始就好用力咁游，大概游到十五米左右，雖然游完見佢有d 氣喘，都唔錯啦~
希望佢今個暑假學識!


ps 本來想影相，最衰泳池影唔到啦...


好累，下次再打過。

[ 本文章最後由 mbean 於 08-6-6 23:54 編輯 ]

mbean

上個星期仔仔開始游到自由式，今個星期就係練習自由式為主，兼且學背泳。熱身就踼板，同埋做單手吸呼。仔仔雖然唔係游得最快，但都好俾心機。明顯地比之前游得快左同游得耐左。游完教練就一個一個咁指導。做完示範，就要一個一個游自由式。大概二十米左右，由練習池一端游去另一端。仔仔都做到咁既距離，哈哈~ 幾叻仔~ 教下又游下來回游左幾轉，來左一個小休，教練同佢地傾下計，問下佢地d野。仔仔學下同其他人溝通，學下點表達自己都好既。
        休息左一陣，教練就要佢地抱住浮板，浮係水面，開始練習背泳。由於前幾堂都有練習背浮。浮完一陣就講踼腳。可能同自由式相似，個個都做得唔錯。之後就來回踼了幾轉，左上右落，都冇撞到其他人。講完腳就講手。一個一個托住慢慢做，之後就要自己做lu。

見到佢地做到咁，都唔錯啦~ 不過已經學左一半course，唔知到最後會點呢… hehe

PS 個教練好特別，佢寫左張咭俾我仔仔同其他小朋友，因為有卓毅游泳會個印，我開頭以為係咭片之類，原來教練係張咭後面寫住叫佢地考試努力d之類既說話…. 都幾得意  

[ 本文章最後由 mbean 於 08-6-20 20:39 編輯 ]

mbean

仔仔習泳記(七)

不知不覺又考完試，仔仔快放暑假。係時候要諗下點樣安排暑期活動。不過其中一個將會係繼續學游水。唔想佢地成日困係屋企，活動多d，唔會咁肥，晒下太陽就唔會成隻白皮豬仔咁~ hehe。

星期日個日有d 雨，開頭驚凍，不過落左水又ok喎。仔仔一班上左咁多堂，都知道教練要佢地做乜，好似聽話左dd。
練左透氣之類，跟住就練游lu。Yeah~ 仔仔游到十幾二十米lu，雖然唔係好多，但都叫識游少少喇。

練完自由式就再練背泳。辛苦完就浮係水面，練下浮踼下腳。今日大家都浮得唔錯，之前仔仔都係唔習慣d 水浸住耳仔既感覺，但練得多左就習慣左，而家好左好多，背浮都唔會浮一小段就要起身咁。練左背浮就再練背浮踼腳。教練話今日係要練到會直線咁游。扶住池邊練習左踼腳，其實同自由式差唔多，只係反轉左，又好似真係學得快左(心理作用??)。 由於已經識得浮，今當學得都幾爽手。

最後仲入埋大池練習多d 踩水(但我有d驚驚地)，大d 既小朋友就踩到，仔仔就唔係好慣，下次再黎過!!!!

mbean

開學前真係超忙，之前打左都唔記得post出黎，宜家post埋佢。

仔仔習泳記(八)

仔仔蛙式同自由式已經游到咁上下，呢堂就主要改好d壞動作。跟住練埋之前教既踩水。我就覺得踩水最重要喇，因為起碼唔會咁易浸親嘛。以我記得，呢堂開始係大池度游，開頭連我都驚，不過個仔游多幾游，就唔係好驚lu。佢最後游到三條泳線左右。除左人多D 外，上堂都幾順利。

mbean

第九堂

今堂係第九堂，仲有一堂就要做評估。最主要評估既係距離同耐力wow。今堂就係俾佢地練習下要評估既內容，其中一項係踼腳仔，睇下去唔去水，同埋可以游到幾遠。第二項就係睇下可以成個自由式游到幾遠。幾個小朋友既情況都唔同，教練俾左d 練習佢地做，又集中逐個幫佢地點樣改。仔仔要改下成日望前面既問題，教練要佢踼腳望住教練放係水中既手，之後就轉頭透氣。練完技術就要練習全式。今堂游得多左，可能聽到話評估都俾心機d。

mbean

第十堂

仔仔今日做評估，其實做既野唔係好多，只係踼腳，同游自由式。不過聽到話要計時，個個都搏晒命，好用力咁踼腳，踼左二十五米左右啦。其他小朋友都好用心機咁做評估，每人有兩次機會，有d 一次就得，有d 就要兩次，但四個都合格。


第二項就係游自由式，都係游廿五米，仔仔要游一個練習池，第一次佢游到看更台就停左，所以要再黎過。之後就要睇人地做評估先，其他人都考到，之後先到仔仔。大概休息左一陣，又睇左人地點游，到佢自己游時就更加努力，游得唔係好快，但勝在都完成到。


評估完之後就練習返背泳之類。


做完評估，教練送左一隻鴨仔俾佢地當畢業禮物同鼓勵佢地喎。隻鴨仔就寫住仔仔個名同游到幾遠，咁又幾有心思既。

總括
今年仔仔學游水都學得唔錯，個教練又教得唔錯，游得幾開心。諗住俾個仔學住先，橫惦平時淨係成日係屋企睇電視。

不過今年最衰就係泳池免費，所以太多人。開學後應該好d卦。


(ps 呢排間唔中有人pm我，問我係邊度學。我留低個網址俾你地啦，你地有興趣就睇下啦。不過我唔知post唔post得，如果唔post得，麻煩話我知，我再delete左個網址佢)
http://www.a-tough-swimming-club.co.cc/